Burera:MINALOC yatangije ibikorwa by'imirimo ihabwa abaturiye umupaka

Minisiteri y'Ubutegetsi bw'Igihugu irasaba abaturage bagera ku bihumbi 100  baturiye umupaka wa Uganda mu turere twa Burera,Gicumbi na Nyagatare kubyaza umusaruro amafaranga bagiye kujya bahembwa mu mirimo y'amaboko batangiye gukora igamije kubakura mu bukene aho kuyashora  mu biyobyabwenge.

Gakuba Jean Baptiste na Nyiraneza Consolee ni abaturage bo mu Karere ka Burera bishoye mu burembetsi burabakenesha none uyu munsi bari mu basaga ibihumbi 4000 batangiye imirimo y'amaboko muri gahunda Leta yashyizeho igamije kuzamura abaturiye umupaka bugarijwe n'ubukene

Aba kimwe n'abandi biganjemo urubyiruko bashima ko ubuyobozi bwabatekerejeho icyizere akaba ari cyose ko imirimo bahawe igiye kubabera imbarutso y'iterambere.

Minisitiri w'ubutegetsi bw'Igihugu Gatabazi Jean Marie Vianney asaba abatoranyijwe kujya muri iyo mirimo kubyaza umusaruro amahirwe babonye birinda gushora amafaranga bazakuramo mu mu biyobyabwenge ahubwo bakayashyira mu  bibyara inyungu

Minisitiri Gatabazi kandi yanatangaje ko by’umwihariko ku bahoze ari abarembetsi mu buri karere gakora ku mupaka wa Uganda, bagiye guhurizwa muri koperative zo kubafasha kwiga imishinga ibyara inyungu maze na yo igaterwa inkunga binyuze mu kigega BDF.

Mu Karere ka Burera ahatangirijwe iyo mirimo bahereye mu bikorwa byo gutunganya imihanda yangiritse, imiyoboro y'amazi n'ibindi bikorwaremezo. Muri Burera gusa, imirimo nk'iyi izagendaho asaga Miliyoni 400, azishyure abarenga ibihumbi 4000 bazayikoramo, aho buri muntu azajya yishyurwa  ibihumbi 2000 ku mubyizi umwe

Ally MUHIRWA