GEN. PATRICK NYAMVUMBA YABONANYE NA PEREZIDA TSHISEKEDI MURI DRC

GEN. PATRICK NYAMVUMBA YABONANYE NA PEREZIDA TSHISEKEDI MURI DRC

Yanditswe May, 11 2019 at 10:40 AM | 4612 Views




Umugaba Mukuru w’Ingabo w’u Rwanda, Général Patrick Nyamvumba yakiriwe na Perezida wa Repubulika Iharanira Demokarasi ya Congo, Félix Tshisekedi, kuri uyu wa Gatanu tariki 10 Gicurasi 2019.

Ni mu rugendo rw’akazi Umugaba Mukuru w’Ingabo z’u Rwanda yagiriye muri Congo, aho yakiriwe mu biro by’umukuru w’iki gihugu, ari kumwe n’umugaba Mukuru w’Ingabo za Congo Lt-Général Célestin Mbala.


Akimara kubonana n’Umukuru w’Igihugu cya Congo Général Patrick Nyamvumba yatangarije itangazamakuru rya Congo ko yashimiye umukuru w’igihugu cya Congo imibanire myiza ku mpande zombi mu bijyanye n’igisirikare.

Yagize ati “Turi hano nk’itsinda ry’u Rwanda ku butumire bwa  mugenzi wanjye Umugaba Mukuru w’Ingabo za Congo.  Twagize inama nziza, kandi twaje gusura na Perezida wa Repubuka wa Congo ngo tunamushimire imbaraga ashyira mu kongera imibanire myiza ku nzego za gisirikare hagati y’impande zombi n’imikoranire myiza, ndetse tunamugezeho indamutso za Nyakubahwa Perezida wa Repubulika y’u Rwanda.


Ku rundi ruhande, Umugaba Mukuru w’Ingabo za Congo Lt-Général Célestin Mbala nawe yashimangiye ko uru rugendo ruzongera imikoranire myiza hagati y’ibihugu byombi mu rwego rwa gisirikare.

Yagize ati “Turi abaturanyi, kandi nk’abaturanyi tugomba kurushaho kongera kunoza imibanire, ku buryo dushobora kongera ubufatanye ku bijyanye n’umutekano hagati y’inzego za gisirikare zombi ku buryo twizeza abaturage mu kubaha umutekano uhagije bakabaho mu mahoro, tukirinda umutekano muke hagamijwe iterambere ry’aka karere kacu.”


Inkuru ya Richard Irakoze




Ba wambere gutanga igitekerezo

Tanga igitekerezo:



RSS FEED

RDC: Perezida Félix Tshisekedi yasuye Amerika