Kugaburira abanyeshuri ku mashuri bishobora kugabanya ikibazo cyo guta ishuri ku bana - Abarezi

AGEZWEHO

  • BNR yazamuye igipimo cy’inyungu iheraho inguzanyo banki z’ubucuruzi – Soma inkuru...
  • Abatega bava cyangwa bajya mu Mujyi wa Kigali barataka kubura imodoka – Soma inkuru...

Kugaburira abanyeshuri ku mashuri bishobora kugabanya ikibazo cyo guta ishuri ku bana - Abarezi

Yanditswe Jul, 14 2022 19:11 PM | 33,876 Views



Inzego z'uburezi mu Rwanda, ababyeyi n'abanyeshuri baremeza ko gahunda yo kugaburira abana ku mashuri ishyizwe mu bikorwa neza yakemura burundu bimwe mu bibazo bikibangamiye uburezi by'umwihariko icyo guta amashuri.

MUSABYIMANA Belancile ni umubyeyi w'abana 8 utuye ku i Ramiro mu murenge wa GASHORA mu karere ka Bugesera. Bane (4) mu bana 8 afite biga ku rwunge rw'amashuri rwa Dihiro ari naho bafatira ifunguro rya saa sita. Uyu mubyeyi na bagenzi be bavuga ko gahunda yo kugaburira abana ku mashuri izwi nka school feeding yaje ari igisubizo.

Aba babyeyi bemeza ko gufatira ifunguro rya saa sita ku ishuri byafashije abana babo gutsinda neza ibintu bahurizaho n'abana babo. By'umwihariko iyi gahunda yarushijeho gutanga umusaruro ku rwunge rw'amashuri rwa Dihiro mu murenge wa Gashora, nyuma yaho babonye umufatanyabikorwa ugaburira abana babo kandi akabaha indyo yuzuye buri munsi.

Ody Schashua, ukomoka muri Israel ni we washinze umuryango The Jonathan Foundation wahinduye ubuzima bw'abatuye Gashora nyuma yo kugirana amasezerano na leta yo gucunga ishuri rya Groupe Scolaire Dihiro, aho agaburira abana ku manywa nta kiguzi, ndetse akaba yarongereye ibyumba by'amashuri n'ibindi bikorwa remezo byanatanze imirimo ku baturage.

Ody Schashua avuga ko umutima wo gufasha abanyarwanda yawutewe n'urugwiro yagaragarijwe n'abana b'i Gashora ubwo yajyaga kuruhukirayo nyuma y'ibyago yagize byo kubura umwe mu bana be. Ngo nta kindi yari kwitura abo bana uretse kububakira umusingi w'ahazaza.

"Bugesera izwiho imvura idahagije bivuze ko muri iyi Isi iyo ubuze imvura uhura n'ikibazo cy'ubukene n'ibiribwa bidahagije. Ndimo gutanga ahazaza, ndimo gutanga amahirwe. Ntanze ibiribwa gusa nta cyo naba mfashije kuko sinzabaho iteka ryose, icyo gihe rero aba bana ntibazongera kubona ibyo biribwa nabahaga. Icyo nshaka ni ukubafasha kuzishakira ibyo biribwa bakiga bagatsinda kuko nemera ko nta hazaza h'aba banyeshuri mu gihe batakwiga."

Ngo uretse gutsinda neza, gahunda yo kugaburira abana ku ishuri ishobora gutuma ikibazo cyo guta ishuri kiba umugani nk'uko Jimmy Christian Byukusenge, Umuyobozi ushinzwe imirimo rusange muri Minisiteri y'uburezi yabitangaje.

Amabasaderi w'igihugu cya Israeli Mu Rwanda Dr. Ron Adam nawe ashishikariza abana kwiga no guhanga ibishya kugirango bazagire ejo heza. Yabitangaje kuri uyu wa kane ubwo hizihizwaga imyaka 2 ishize hatangiye ubufatanye hagati ya leta na The Jonathan foundation.

Ibi kandi bishimangirwa n'umuyobozi w'Akarere ka Bugesera MUTABAZI Richard, ushima uruhare rwa Jonathan Foundation mu guteza imbere uburezi muri aka karere.

Gahunda yo kugaburira abana ku mashuri izwi nka school feeding igamije gufasha abana kwiga neza bityo bagatsinda uko bikwiye. Muri 2014 iyi gahunda yatangiriye mu mashuri y'uburezi bw'imyaka 9 na 12 ndetse politiki yayo yemezwa na Guverinoma y'u Rwanda muri 2019 ihita iba itegeko mu mashuri yose uhereye mu y'abanza, aho leta itanga uruhare rwa 60% umubyeyi agatanga 40% by'ikiguzi cy'ifunguro ry'umunyshuri.

Divin Uwayo




Ba uwambere gutanga igitekerezo

Tanga igitekerezo:



RSS FEED

Amajyepfo: Isuri itwara toni 428 z'ubutaka kuri hegitari buri mwaka

Ibibazo bigaragara mu guhererekanya ubutaka bigiye gukemurwa mu mezi abiri - Min

Abasenateri basabwe kurushaho kwegera abaturage hagamijwe kumenya uruhare bagira

Kigali: Abatega imodoka rusange barinubira umwanya munini bamara ku byapa no mur

Abagurisha ibikoresho by'ikoranabuhanga byakoze bazajya babanza gutanga imy

Abakorera n’abagenda i Nyabugogo barasaba ko imirimo yo kwagura ikiraro cy