Hari abagicuruza ibyuma bikonjesha byangiza ikirere kandi byaraciwe

Hari bamwe mu bacuruzi bavuga ko hari ahakiri ibyuma bikonjesha bitakemewe ku isoko nyuma y'uko biciwe kuva mu mwaka wa 2016. Ikigo gishinzwe kubungabunga ibidukikije (REMA) kigira abantu inama yo gushishoza no kugura ibyuma byujuje ubuziranenge kuko biboneka ku isoko.

Amasezerano ya Montreal yavugururiwe i Kigali mu mwaka wa 2016 yashyize iherezo ku kongera gutunganya no gukoresha gaz ishyirwa mu byuma bikonjesha ibiribwa n'ibinyobwa, ibitanga ubushyuhe mu nzu no mu binyabiziga.

Ni ibyuma bikoresha imyuka yangiza akayunguruzo k'izuba kazwi nka Ozone. Hari abemeza ko bimwe muri ibi byuma bikiri ku isoko kubera ko uyu mwanzuro wafashwe byaramaze kuhagera.

Ku rundi ruhande, abaguzi b'ibi bikoresho bikonjesha ni ukuvuga frigo n'ibindi bitanga umwuka mu nzu no mu modoka bahamya ko icyo bitaho mu kugura ibi bikoresho ari ugucungana n'ibiciro cyangwa kompanyi yabikoze bityo ngo ibyo kumenya niba byagira ingaruka ku buzima ngo ntibabahangayikisha cyane.

Kuri ubu hari ibyuma REMA kivuga ko byujuje ubuziranenge kandi byamaze kugera ku isoko ry'u Rwanda, ibintu yemeza ko bifite inyungu nyinshi ku babikoresha no ku buzima rusange bw'ibidukikije.

Abacuruza ibi byuma bitandukanye basobanura ko n'ubwo ibigezweho muri iki gihe bisa n'ibifite ibiciro byigiye hejuru ho 10% by'ibiciro by'ibisanzwe, ngo bifite umwihariko wo kuzigama umuriro usanzwe ukoreshwa.

Ibyuma bikonjesha n'ibitanga umwuka byemewe muri iki gihe,  bifite ibirango birimo imibare 410 na 610; bikaba byarasimbuye ibyari bifite umubare 22 byifitemo imyuka ihumanya ikirere. Ibihugu bimwe byashoye imari ibarirwa mu mamiliyari y'amadolari nka Amerika, ibihugu by'Abarabu n'ibindi bizatangira guca burundu bene ibi byuma guhera mu mwaka wa 2028.

Inkuru mu mashusho

Jean Claude Mutuyeyezu