Inyota ni yose: Hari abaturage bifuza amashanyarazi

Hari bamwe mu baturage bavuga ko bafite inyota yo kugezwaho umuriro w'amashanyarazi kugira ngo nabo bave mu icuraburindi, nubwo banatekereza kuzabyaza umusaruro uyu muriro. 

Sosiyete y'u Rwanda ishinzwe gukwirakwiza amashanyarazi, yizeza ko imbaraga zirimo gushyirwa mu bikorwa byo kwegereza abaturage amashanyarazi zizaga 100% bayabonye bitarenze mu mwaka wa 2024 nkuko bikubiye muri gahunda ya guverinoma.

Iyo uzengurutse hirya no hino mu gihugu ntubura gusanga amapoto y'amashanyarazi mu tugari dutandukanye, aho hamwe abaturage bamaze kuyabona naho abandi baracyategereje.

Nyabyenda Marcel  utuye mu kagari ka Nyamweru mu murenge wa Kanyinya mu karere ka Nyarugenge, we yamaze kwegeranya ibikoresho by'ibanze bizatuma umuriro ubasha kwinjira mu nzu ye, avuga ko batagereje n'amatsiko menshi guhabwa umuriro kuko bazi neza akamaro kawo katari ako gucana gusa.

Mu metero zitarenze 300 uvuye kuri uru rugo, hatuye Suzana Uwiragiye nawe kugeza ubu urugo rwe rutegejereje ko umuriro uzahagera, icyizere ni cyose kuko azi neza ko umuriro abaturage bemerewe n'umukuru w'igihugu ugomba kubageraho byanze bikunze.

Mu gihe bamwe mu batuye mu karere ka Nyarugenge bagitegereje kugezwaho umuriro, abo mu mirenge igize akarere ka Rulindo yo barimo kuwuhabwa. Abakozi b'ikigo gishinzwe gukwirakwiza amashanyarazi barimo kwerekeza urutsinga rwayo mu rugo rwa Noheli Jean Marie Vianney utuye mu murenge wa Shyorongi kandi birumvikana ko akanyamuneza ari kose ku muryango we.

Inzego zifite aho zihuriye no kwegereza abaturage amashanyarazi, zishimangira ko zikomeje gukora uko zishoboye kugirango abaturage bose bahabwe umuriro w'amashanyarazi.

Guverinoma y'u Rwanda ifite intego ko mu mwaka wa 2024 buri muturage azaba afite umuriro w'amashanyarazi aho 70% bazaba bafatira ku murongo mugari naho 30% bawukura ku zindi ngufu.

Umuyobozi Mukuru wa REG, Ron Weiss ati "Nakubwira ko igihe nazaga hano mu Rwanda muri 2017, abari bafite abashanyarazi ntibarengaga 36%, kandi abasaga guhabwa amashanyarazi bari bake cyane, gusa ubu abatarayabona ni hafi 30% gusa kandi dufite ubusabe butigeze bubaho. Turi gukora ku mashanyarazi y'umuyoboro mugari n'amashanyarazi yisubiramo,  u Rwanda rwamaze kubona inkunga ya banki y'isi aho abaturage bazoroherezwa kubona umuriro biciye mu byiciro by'ubudehe. Nizeye ntashidikanya ko umwaka w 2024 uzarangira abaturage 100% bafite amashanyarazi."

Raporo y'ikigo mpuzamahanga gikora ubugenzuzi ku ikwirakwizwa ry'amashanyarazi,  giherutse gushyira u RWanda mu bihugu 20 byakoze impinduka zikomeye mu rwego rw'amashanyarazi kuko nko mu mwaka wa 2018/2019 rwongereye 3% by'abaturage bayahawe ibigaragaraza imbaraga igihugu gifite mu kuvana abaturage mu icuraburindi ari nako uyu muriro ubabyarira inyungu zitandukanye.

Jean Claude Mutuyeyezu