I KIGALI HARIGIRWA UKO HAKORESHWA IKORANABUHANGA MU IBARURISHAMIBARE

I Kigali hatangijwe inama mpuzamahanga yiga ku kamaro k’ibarurishamibare mu igenamigambi ry’ibihugu hagamijwe iterambere rishingiye ku mibare ifatika.

Iyi nama ibaye ku nshuro ya gatanu, abayiteraniyemo bemeza ko kugirango Igenamigambi ry’ibihugu mu iterambere ribashe kugerwaho nta cyakorwa hatabayeho ibarurishamibare rihamye rigaragaza umubare n’ishingiro ry’ikibazo kigomba gukemurwa.

Aha abahanga mu bigendanye n’ibarurisha mibare batanga urugero rw’uko mu kugenzura ishyirwamubikorwa ry’intego z’iterambere rirambye SDG,  ku ntego ifite intumbero y’iterambere rirambye ritagira uwo risiga inyuma, iyi ntego idashobora kugerwaho hatabayeho ubushakashatsi bugizwe n’imibare igaragaza umubare nyawo w’abaturage bagomba kuva mu bukene, imbogamizi bafite, ingamba ndetse n’ahagomba kuboneka amahirwe yo gukemura ikibazo gihari haherewe ku mubare ufatika.

Minisitiri w’Intebe w’u Rwanda Dr Edouard Ngirente ari kumwe n’umuyobozi wa banki y’isi ishami ry’u Rwanda bafunguye ku mugaragaro inyubako nshya izakorerwamo n’ikigo cy’igihugu cy‘ ibarurishamibare mbere yo gutangiza ku mugaragaro inama mpuzamahanga yiga ku kamaro k’ibarurishamibare.

Zimwe mu mbogamizi zagaragajwe zigihari ni uko usanga bimwe mu bihugu bidashyira ingengo y’imari ihagije mu ibarurishamibare kuko akenshi usanga bihenze. Indi mbigamizi ya garagajwe ni ubumenyi budahagije mu bakora muri urwo rwego aho abateraniye muri iyi nama bagatagazako hakenewe ubufatanye bw’ibihugu mu guhanahana inararibonye n’amahugurwa ahagije mu ibarurishamibare. Ni Imana iri kuba ku nsanganyamatsiko igira iti “Gukorera hamwe no kwigira hamwe.”

Mu zindi mbogamizi zagaragaje harimo ikoreshwa ry’ikoranabuhanga mu ibarurisha mibare, aho abateraniye muri iyi nama bavugako hakenewe guteza imbere ikorabuhanga rikataje mu ibarurishamibare aho bemeza ko hakenewe ubushake bwa Politiki mu gushora imari mu ikorabuhanga rikoreshwa muri urwo rwego.

Muri iri barurishamubare rizwi nka “Big Data for Official Statistics”, ni uburyo bwifashishwa mu kubona imibare n’amakuru ku kintu runaka hatabayeho ibarura risanzwe ryo kubaza umuntu kuwundi, ahubwo kuri ‘Big Data’ hagakoreshwa ikoranabuhanga rikataje mu kubona ayo makuru.

Iyi nama ibaye impurirane n’igikorwa cyo gufungura ku mugaragaro inyubako nshyashya izajya ikoreshwa n’ikigo cy’igihugu gishinzwe ibarurishamibare. 

Inkuru ya Bienvenue Redemptus