AGEZWEHO

  • Ibigo by’imari byasabwe kwirinda ruswa ibigaragaramo – Soma inkuru...
  • Ikoreshwa ry’ikoranabuhanga mu buhinzi rigeze he? – Soma inkuru...

I Rubavu hatashywe ibikorwa remezo by'amashanyarazi

Yanditswe Mar, 12 2022 21:13 PM | 44,800 Views



U Bubiligi bwamurikiye Minisiteri y'Ibikorwa remezo imishinga bwateye inkunga yo kwagura umuyoboro w'amashanyarazi mu Karere ka Rubavu ukava kuri kilovolute 6 watangaga ukagera kuri 30.

U Bubiligi bwijeje ko bazakomeza gufatanya na Leta y’ u Rwanda mu mishinga nk 'iyi  ihindura  imibereho y'umuturage.

Muri uyu mushinga havuguruwe imiyoboro yahubatswe mu myaka irenga 30 ishize. Yongererwa ubushobozi buva ku kigero cya kilovolute (kV) 6,6  bugera kuri kilovolute 30. 

Ibi byagezweho nyuma yo kubaka  za  kabine 20 ndetse zose zishyirwamo imashini ziringaniza ikigero cy’amashanyarazi.

Hanubatswe  kandi imiyoboro mishya ireshywa n’ibilometero 14 by’imiyoboro iringaniye n’ibirometero 34.7 by’imiyoboro mito.

Binyuze muri  uyu mushinga hanashyizweho  amatara yo  ku  mihanda ku birometero bigera kuri 7.2 mu Murenge wa Gisenyi. 

Abatuye mu Karere ka Rubavu bavuga ko  kuba ingufu z’ amashanyarazi zarongerewe byakemuye ikibazo baterwaga no kutagira amashanyarazi ahagiije. 

Kuva mu mwaka wa 2014, binyuze mu Muryango Enabel, u Bubirigi bwagiye butera inkunga imishinga myinshi yo guteza imbere ingufu mu Rwanda harimo iyo gukwirakwiza amashanyarazi ndetse no kwagura imiyoboro yayo.  

Ikubiye mu nkunga ingana na miliyoni 39 z’amayero yashyizwe muri gahunda yo gukwirakwiza amashanyarazi.  Binyuze muri iyi nkunga ibilometero bisaga 1000 by’imiyoboro mishya y’amashanyarazi byarubatswe ndetse ingo zisaga 50,000 zihabwa amashanyarazi afatiye ku muyoboro rusange mu Ntara y’Iburasirazuba.

Ambasaderi w’u Bubirigi mu Rwanda, Bert Versmessen, yavuze ko  u Bubirigi butewe ishema no kuba bwaragize uruhare mu guteza imbere ingufu mu Rwanda.

Minisitiri w’Ibikorwaremezo, Dr. Ernest Nsabimana yacyeje ubufatanye bw'u Bubiligi ashimangira  ko hari byinshi bimaze kugerwaho biturutse ku bufatanye hagati y’ibihugu byombi ndetse ko bukomeje kuba imbarutso y’iterambere ry’ubukungu.

Urwego rushinzwe Ingufu mu Rwanda rukomeje gutera imbere  uhereye ku nganda zitanga  amashanyarazi, imiyoboro iyageza mu bice bitandukanye by’igihugu ndetse n’iyakwirakwiza mu baturage.

Ubu ingo zifite amashanyarazi mu gihugu zirasaga 68.48%.

Intego nyamukuru u Rwanda rwiyemeje ni uko bitarenze umwaka wa 2024, ingo zose  zizaba zifite amashanyarazi, inganda ziyatunganya zikiyongera ku buryo ingano yayo iba ijyanye n’iterambere igihugu kigezeho, ndetse n’imiyoboro iyakwirakwiza ikongererwa imbaraga ku buryo nta mashanyarazi yongera gutakara cyangwa ngo acikagurike bya hato na hato.


Didace NIYIBIZI



Ba uwambere gutanga igitekerezo

Tanga igitekerezo:



RSS FEED