Ababyeyi barakangurirwa kwita ku mbonezamikurire

AGEZWEHO


Ababyeyi barakangurirwa kwita ku mbonezamikurire

Yanditswe June, 12 2019 at 08:26 AM | 5096 Views



Benshi mu babyeyi RBA yaganiriye nabo bavuga ko basobanukiwe neza n'akamaro ko kwita ku mibereho y'umwana, n'ubwo ngo imbogamizi nazo zitabura.

Muhawenimana Consolee, Umuturage muri Rulindo yavuze ati, "Umwana uri mu nda agomba kugaragarizwa urukundo, akabaho nta kibazo yumva hagati y'ababyeyi be, ikindi ni ugufata indyo yuzuye, ikindi ni ukwita ku isuku yabo, nkagira igihe gihagije cyo kuganira nabo.

Mukandayisenga Chadia, Umuturage wa Nyarugenge, i Kigali nawe yavuze ati, "Akenshi nkunda kuba nzenguruka muri gare, nta nzu mfite yo kubamo, simbasha gutekera umwana wanjye ibyo kurya byiza, hari ubwo aburara akanabwirirwa bitewe nuko mba nabuze amafaranga". 

Umuhuzabikorwa wa gahunda y'igihugu mbonezamikurire y'abana bato Dr Assimwe Anita, avuga ko imbonezamikurire ikubiyemo ibikorerwa umwana kuva agisamwa kugeza agize imyaka 6. 

Muri ibyo harimo kwita ku buzima bw'umubyeyi, ubw'umwana, imirire ye, isuku n'isukura, gukangura ubwonko no kwita ku burezi bwe. Mu gihe ibi bititaweho ngo bigira ingaruka zikomeye ku mwana.

"Ubwonko bw'umwana tubukangura hakiri kare cyane, umwana akiri mu nda ya mama we, yanavuka mu mezi ya mbere, mu myaka ya mbere tugakomeza. Ni iby'ingenzi cyane kuko ubushakashatsi bwagaragaje ko umwana ajya kugira imyaka 3, ubwonko bwe bumaze gukura ku kigero cya 80%. Iyo butageze ku 100%, ubuzima buramugora, ugasanga arasibiye, ataye ishuli, mu buzima ntamenye kubana n'abandi neza, yaba mukuru nabwo kwibeshaho bikamunanira, ibyoroheye abandi bikamugora,"Assimwe. 


Kuva kuri uyu wa kabiri i Kigali hateraniye inama mpuzamahanga ku mbonezamikurire y’abana bato yitabiriwe n’abafatanyabikorwa  b’ingenzi muri gahunda mbonezamikurire y’abana bato basaga 300. 

Uretse u Rwanda iyi nama yitabiriwe n'intumwa zo mu bihugu bigera kuri 11 bya Afrika.

Ministre w’uburinganire n’iterambere ry’umuryango Amb. Solina Nyirahabimana avuga ko kwita ku mwana ari kimwe mu byo igihugu gishyizemo imbaraga kugira ngo kizagire abaturage bafite ubuzima bwiza kandi bashoboye.

"Igihugu cyacu gishingiye ku muntu, iterambere ryacyo rishingiye ku muntu n'ubumenyi bwe, tutareze umwana kuva akiri muto kugira ngo azagire bwa bumenyi bwifuzwa, n'igihugu ntabwo cyabasha gutera imbere. Abantu nibo bakorera igihugu mu nzego zose, bagomba kugira ubumenyi n'ubushobozi".

Abitabiriye iyi nama bibukijwe ko umubyeyi ariwe mwarimu wa mbere ku mwana akaba ari nawe uza ku isonga mu kwita ku mikurire ye. Kugeza ubu 38% by’abana mu Rwanda baragwingiye. 

Mu ngamba zafashwe kugira ngo uyu mubare ugabanuke ugere kuri 19% mu mwaka wa 2024 harimo kwita ku babyeyi batwite, gutanga ifu ndetse n'amata ku bana bato no kwigisha ababyeyi kurushaho kwita ku bana babo. 

Mu Rwanda kandi habarurwa ibigo mbonezamikurire y'abana bato bigera ku 4325, intego ni uko bizagera muri buri mudugudu wo mu gihugu.

Mu mwaka w'ingengo y'imari ugiye gutangira, gahunda mbonezamikurire y'abana bato yagenewe agera kuri miliyari 12 z'amafaranga y'u Rwanda.

Ni inkuru ya Carine Umutoni



Ba wambere gutanga igitekerezo

Tanga igitekerezo:



RSS FEED

KWIBOHORA: Abahoze muri EX FAR bagarutse kuri gahunda yo guhuza ingabo

17 BAKURIKIRANYWEHO GUTEGURA AMAHUGURWA YA BARINGA.

RWANDAIR ITANGIJE INGENDO ZIHUZA KIGALI NA TEL AVIV

KWIBOHORA 25: ABATURAGE BISHIMIYE GAHUNDA YO KUBAKIRA ABATISHOBOYE

Itangazo ry’Ibyemezo by’Inama y’Abaminisitiri, tariki ya 24.06

KURINDA VIH-SIDA ABANA BAVUKA NO GUTUMA ABANDUYE BITWABWAHO BYOROSHYE