Iby’uburasirazuba bwa DRC biragana he?

Abasesengura ibikomeje kubera mu burasirazuba bwa Congo bavuga ko bigoye ko aka gace kabona amahoro mu gihe abavuga ururimi rw'ikinyarwanda batarabona umutekano kandi bagakomeza guhohoterwa n’Ingabo za leta zifatanije n’indi mitwe harimo n’umutwe w’iterabwoba wa FDRL.

Hashize amezi atanu umutwe wa M23 uhanganye n’ingabo za Leta ya Congo FARDC, uyu mutwe umaze kwigarurira uduce dutandukanye mu burasirazuba bwa Congo.

Abasesengura ibibera mu burasirazuba bwa congo bavuga ko habarirwa imitwe yitwaje intwaro isaga 120 ariko ubu umutwe wa M23 ni wo urimo kuvugwa muri iki gihe.

Mu cyumweru gishize umuhuza w’Umuryango wa Afurika y’Iburasirazuba ku kibazo cya Congo, uwahoze ari Perezida wa Kenya Uhuru Kenyatta yasuye Kinshasa, nyuma ajya i Goma aho yasuye impunzi zakuwe mu byabo.

Nyuma y’ibiganuro yagiranye n’abakuru b’ibihugu yasohoye itangazo risa n’irimeze nk’ibtabaza. Muri iri tangazo hagaragaramo gusaba umutwe wa M23 gushyira intwaro hasi ndetse ukanava mu bice wafashe mbere y'ukwezi kwa 4 uyu mwaka.

Ku basesenguzi ibi byose bemeza ko bigaragaza ko ibintu bizakomeza kuba agatereranzamba mu gihe hatarebwa umuzi w'ibibazo by'umutekano muke mu burasizuba bwa congo.

Imyaka igera kuri 28 irashize uburasirazuba bwa Congo bukomeje kurangwamo ibibazo by'umutekano muke, ibi bikaba bisanishwa no kuba abasize bahekuye u Rwanda ariho bibereye bidegembya.