Imboni z'imiyoborere muri Kicukiro zasabwe kwegera abaturage no gufatanya mu bikorwa bigamije iterambere

Imboni z'imiyoborere mu karere ka Kicukiro zasabwe kwegera abaturage no gufatanya mu bikorwa bigamije iterambere, abatuye aka karere bakaba bishimira ibikorwa by'iterambere birimo imihanda bakomeje kwegerezwa, ariko bakifuza ko ubuyobozi burushaho kubegera aho batuye kugira ngo bamenye aho kongera imbaraga.

Mu biganiro byahuje imboni z'imiyoborere mu karere ka Kicukiro n'Umujyi wa Kigali, kuva ku mudugudu kugeza ku karere, abayobozi b'inzego z'ibanze bamurikiwe ikayi igiye kwifashishwa mu ishyirwa mu bikorwa ry'imihigo.

Umuyobozi w'Umujyi wa Kigali, Pudence Rubingisa yasabye imboni z'imiyoborere kurushaho gufatanyiriza hamwe mu gukemura ibibazo abaturage bahura nabyo.

Umujyi wa Kigali uvuga ko ikayi y'imihigo, abayobozi b'inzego z'ibanze bagiye gukoresha izoroshya gukurikirana ishyirwa mu ibikorwa rya gahunda zitandukanye no kumenya uko umuturage afashwa.