Impunzi z’Abanyekongo zo mu nkambi ya Mugombwa zasuwe harebwa ibikorwa by’iterambere

Impunzi z'Abanyekongo ziri mu nkambi ya Mugombwa mu karere ka Gisagara zikora ibikorwa bitandukanye birimo ubucuruzi, ubuhinzi n'ubworozi ziravuga ko imishinga nk'iyi bakora yunganira inkunga bahabwa isanzwe igenerwa impunzi ubusanzwe iba idahagije.

Ibi babigarutseho ubwo umuyobozi wungirije w'ishami ry'umuryango w'abibumbye ryita ku mpunzi, Kelly Clements yasuraga ibikorwa by'iterambere bikorwa n'impunzi ziri mu Rwanda.

Mu bikorwa by'iterambere bikorwa n'impunzi zo mu nkambi ya Mugombwa harimo ubucuruzi butandukanye, ubuhinzi bukorerwa mu gishanga cyatunganijwe cya Misizi, n'ubworozi bw'amatungo anyuranye arimo inkoko n'ingurube.

Bamwe mu mpunzi bari mu nkambi ya Mugombwa, bavuga ko ibikorwa bakora bibaha amafaranga abunganira mu gutunga imiryango yabo.

Karayenzi Kevin umuyobozi w'inkambi ya Mugombwa, avuga ko hagamijwe kwishakamo ibisubizo no kumva ko abantu badakwiye guhora bategereje inkunga gusa, babafasha no gutekereza ibindi bikorwa byunganira inkunga nto bahabwa.

Umunyamabanga nshingwabikorwa w'akarere ka Gisagara, Ntaganzwa Athanase avuga ko ibikorwa by'iterambere bikorwa na UNHCR  bizamura iterambere ry'akarere ndetse n'iry'umuturage muri rusange, kuko bitazanira inyungu impunzi gusa ahubwo binazizanira n'abaturage baturiye iyi nkambi muri rusange.

Kugeza ubu imwe mu mishinga ikorwa n'izi mpunzi harimo uw'ubworozi n'ubuhinzi unahuriwemo n'Abanyarwanda baturiye iyi nkambi hagamijwe kubafasha no kwiyumva mu muryango nyarwanda, no kurushaho gushimangira umubano wabo n'abaturanyi babo b'Abanyarwanda batuye mu mirenge ya Mugombwa na Muganza.

Inkambi ya Mugombwa icumbikiye impunzi z'Abanyekongo zisaga ibihumbi 11.

Christine Ndacyayisenga