Karongi: Abahatuye basabwe kuzibukira ingengabitekerezo ya Jenoside n’ibyayibaganishamo byose

Abaturage bo mu Murenge wa Murundi mu Karere ka Karongi, baravuga ko hakwiye inyigisho nyinshi z’ubumwe n’ubudaheranwa bahabwa hagamijwe kwimakaza ubumwe hagati yabo. 

Babivuze bagendeye ku rupfu rwa Mukakanyamibwa Béatrice warokotse Jenoside yakorewe Abatutsi uherutse kwicirwa muri uyu Murenge, ubuyobozi bukemeza ko urupfu rufite aho ruhuriye n’ingengabitekerezo ya Jenoside.

Hashize amezi asaga abiri Mukakanyamibwa yishwe ndetse mu bamwishe ngo harimo n’uwafunguwe wari warafungiwe kugira uruhare muri Jenoside yakorewe Abatutsi. 

Abaturage bavuga ko ingengabitekerezo ya Jenoside igaragara muri bamwe mu batuye uyu Murenge, umuti ngo ukaba waba ibiganiro bihagije ku bumwe n’ubudaheranwa.

Mu nama yahuje abaturage biganjemo abahagarariye abandi n’abavuga rikumvikana bo muri uyu Murenge wa Murundi, umuyobozi w’Akarere ka Karongi yabasabye kuzibukira ingengabitekerezo ya Jenoside n’ibyayibaganishamo byose. 

Ubwo iki kibazo cyaganirwagaho mu ihuriro ry’ubumwe n’ubudaheranwa by’Abanyarwanda, ihuriro ryabereye i Karongi mu cyumweru gishize, Umunyamabanga Nshingwabikorwa wa Unity Club Intwararumuri, Iyamuremye Regine yavuze ko ari byiza kuba babiganiriyeho, yizeza ko bazafatanya n’ubuyobozi bw’Akarere n’abaturage kubihashya.

Ibindi bikorwa byagaragaye muri uyu Murenge bigaragaza ingengabitekerezo ya Jenoside birimo kwangiza imyaka n’ibindi bihingwa bya bamwe mu barokotse, cyakora abaturage bahamya ko batazadohoka ku ihame ry’ubumwe n’ubwiyunge hagati yabo. 

Aphrodis MUHIRE