Kigali: Abaturage bamwe bagira ikibazo cy'ingendo kubera Car Free Day

Mu gihe bamwe baba bidagadura mu mihanda izira umuvundo w’ibinyabiziga bamwe mu bashoferi n’abagenzi mu mujyi wa Kigali bavuga ko bagirwaho ingaruka n’ifungwa ry’umwe mu mihanda bavuga ko ari ingenzi mu ngendo zo mu mujyi wa Kigali.

Umuhanda uva mu mujyi werekeza ku kibuga mpuzamahanga cy'indege cya Kigali, ni umwe mu mihanda inyurwamo n'ibinyabiziga byinshi mu murwa Mukuru w'u Rwanda kandi ukaba ushamikiyeho indi mihanda myinshi.

Uyu muhanda niwo ufungwa iyo habaye siporo rusange mu mujyi wa Kigali nibura mu mezi atatu akurikirana, abatuye umujyi wa Kigali bakamenyeshwa indi mihanda bakoresha nibura kuva saa moya kugeza saa sita z'amanywa.

Mu gihe bamwe baba bishimira kwidagadura mu mihanda itarangwamo ibyotsi by’imodoka hari abandi bagirwaho ingaruka n’ifungwa ry’uwo muhanda. Nko ku bagenda ku mapikipiki ibiciro biriyongera, abashoferi b’imodoka zitwara abagenzi bo ngo ntibashobora kongeza igiciro mu gihe nyamara ngo kuzenguruka bashaka indi mihanda banyuramo bituma mazutu cyangwa 'essence' byiyongera.

Umuyobozi wungirije w’umujyi wa Kigali,Busabizwa Parfait, ushinzwe iterambere ry’ubukungu , gufunga umwe mu mihanda  kuva saa moya kugeza saa sita z’amanywa rimwe mu kwezi  ngo si ikibazo gikomeye cyahungabanya ingendo muri Kigali.