Umuyobozi ushinzwe ububanyi n'amahanga muri EU yasuye impunzi za Gashora

Kuri uyu wa Mbere, umuyobozi ushinzwe ububanyi n'amahanga mu Muryango w’Ubumwe bw’Uburayi, Josep Borrell ari kumwe na Minisitiri ushinzwe ibikorwa by’Ubutabazi, Marie Solange Kayisire basuye impunzi z’abimukira baturutse mu gihugu cya Libya zicumbikiwe mu nkambi ya Gashora mu karere ka Bugesera.

Borrell yashimye u Rwanda n’Abanyarwanda ku neza bagize yo kwakira izi impunzi z’Abanyafurika baturuka mu bihugu bitandukanye, asezeranya gukomeza ubufatanye buhari mu gutabara abababaye.

Minisitiri ushinzwe ibikorwa by’Ubutabazi, Kayisire Marie Solange yasobanuye ko uru ruzinduko ari ingirakamaro kuko rutanga amakuru ku mibereho y'zi mpunzi.

Kugeza ubu mu nkambi y’agateganyo ya Gashora hacumbikiwe impunzi bakuwe muri Libya 215.

Guverinoma y’u Rwanda, Ishami ry’Umuryango w’Abibumbye ryita ku mpunzi n’Umuryango w’Ubumwe bwa Afurika, basinye amasezerano yo kwita ku mpunzi zari ziriho nabi muri Libya.