Leta y'u Rwanda yasinye amasezerano y'inkunga izafasha kongera amashanyarazi

Leta y'u Rwanda yasinye amasezerano y'inkunga ya miliyoni 10 z'amayero yemerewe n'Ububiligi, agera muri miliyari 8.7. Ni amafaranga bisobanurwa ko aje gushyigikira imishinga yo kongera amashanyarazi mu baturage.

Imishinga izibanda mu turere 3 aritwo Rwamagana, Ngoma na Rubavu. Umuyobozi w'ikigo gishinzwe amashanyarazi REG Mugiraneza avuga ko iyi nkunga izafasha Leta y'u Rwanda kugera ku ntego yayo yo kugeza amashanyarazi mu baturage ku kigero cya 80% muri 2018. Ni mu gihe ubu abaturage babona amashanyarazi bageze kuri 30%.

Ku ruhande rw'ububirigi bwo buravuga ko bushyira imbaraga mu guteza imbere ibikorwa by'amashanyarazi  kuko agira uruhare mu kwihutisha iterambere ry'ibihugu.

Uretse iyi nkunga y'Ububiligi, Leta y'u Rwanda yanasinye amasezerano y'inkunga yahawe n'ikigega nterankunga cy'Abongereza DFID ingana na miliyoni 5 z'amapound. Ni amafaranga azakoreshwa mu guteza imbere ubuhinzi.

Minisitiri w'imari n'igenamigambi Amb.Claver Gatete yavuze Ko leta y'u Rwanda yishimiye inkunga ya DFID izajya mu buhinzi nk'urwego rukomeye kuko  33% by'umusaruro mbumbe uva mu buhinzi n'ubworozi.

Minisitri Gatete kandi avuga ko kuboneka kw'izi nkunga bivuze umubano mwiza u Rwanda rufitanye n'ibindi bihugu.