Louise Mushikiwabo yatangiye imirimo ye nk'umunyamabanga mukuru wa OIF

Umunyarwandakazi, Mme Louise Mushikiwabo, kuri uyu wa 4, yatangiye imirimo ye mishya yo kuba umunyamabanga mukuru w’umuryango mpuzamahanga w’ibihugu bikoresha ururimi rw’igifaransa OIF.

Amakuru dukesha urukuta rwa twitter rw’uyu muryango wa Francophonie aravuga ko, mu gitondo cyo kuri uyu wa 4, aribwo Mme Mushikiwabo yahererekanije ububasha n’uwo asimbuye kuri uwo mwanya, umunyacanadakazi Mme Michaëlle Jean, umuhango wabereye ku cyicaro cy’uyu muryango wa OIF I Paris mu Bufaransa.

Mme Mushikiwabo yatorewe mu nama ya OIF yateraniye I Erevani muri Armenie ku matariki 12 na 13 z’ukwezi kwa 10 k’umwaka ushize.

Abaye umunyamabanga mukuru wa 4 w’uyu muryango w’ibihugu bikoresha ururimi rw’igifaransa OIF.

Ni nyuma y’umunyamisiri Boutros Boutros Ghali wawubereye umunyamabanga mukuru kuva 1997-2002, umunyasenegal Abdou Diouf wabaye kuri uwo mwanya nawe kuva 2002-2014  hanyuma kandi n’umunyacanada kazi Michaëlle Jean, wari uwurimo kuva 2014-2018.