Kuri uyu wa Kane tariki 08 Kamena 2023, Perezida wa Repubulika Paul Kagame akaba n'Umugaba w'Ingabo w'ikirenga yagize Lt Col Simon Kabera Umuvugizi wungirije w'Ingabo z'u Rwanda.

Ibi byatangajwe mu itangazo ryashyizwe ahagaragara na Minisiteri y'Ingabo kuri uyu wa Kane.

 Lt Col Simon Kabera azaba yungirije Col Ronald Rwivanga Umuvugizi w'Ingabo z'u Rwanda.

Ibi bije kandi bikurikira amavugurura yandi yakozwe mu Ngabo z'u Rwanda arimo gushyira abayobozi batandukanye mu myanya ndetse hakaba hari n'abandi birukanywe mu ngabo.

Kuwa Gatatu Perezida Kagame yirukanye mu gisirikare Maj Gen Aloys Muganga na Brig Gen Francis Mutiganda ndetse n'abandi bofisiye 14.

Umukuru w'Igihugu yanatanze itegeko ryo kwirukana mu gisirikare kandi abandi basirikare 116 na ho abandi 112 amasezerano yabo y’akazi mu gisirikare araseswa.

Perezida Kagame kandi yagize Hon. Marizamunda Juvenal Minisitiri w'Ingabo mushya asimbuye Major General Albert Murasira. Ni inshingano yatangiye ku munsi w'ejo nyuma y'ihererekanya bubasha ndetse no kurahirira izi nshingano.

Mu zindi mpinduka zakozwe ni uko Lt General Mubarakh Muganga wari usanzwe ari Umugaba w'Ingabo zirwanira ku butaka yagizwe Umugaba Mukuru w'Ingabo z'u Rwanda asimbuye General Jean Bosco Kazura mugihe Major General Vincent Nyakarundi nawe yagizwe Umugaba w'Ingabo zirwanira ku butaka.

Perezida Kagame yasabye abayobozi bashya gukorana.

Kanda hano usome Inkuru irambuye.

Jean-Paul Niyonshuti