MINEDUC ivuga ko kuba abanyeshuri bakomeje gusubira ntawe bikwiye gutera impungenge

Mu gihe hagitegerejwe ibyavuye mu bipimo byafashwe mu rwego rwo kureba uko icyorezo cya COVID19 gihagaze mu mashuri, kuri uyu wa mbere abanyeshuri biga mu mwaka wa mbere, mu wa kabiri no mu wa kane mu mashuri yisumbuye n’uw’amashuri abanza barasubukura amasomo yabo. Minisiteri y’uburezi ikaba ihumuriza ababyeyi kuko icyemezo cyo gukomeza gufungura ibindi byiciro by’amashuri cyizweho neza.

Amezi 8 yarashize badakoza ikirenge ku ishuri nyuma yaho amashuri afunzwe mu rwego rwo kwirinda ikwirakwira ry’icyorezo cya COVID19. Ngo ntibifuza icyatuma bongera gutakaza igihe nk’icyo.

Ababyeyi b’aba banyeshuri nabo ngo sibo barose amashuri yongera gufungura.

Ku rundi ruhande ariko hari abanyeshuri baje kuri sitade ya Kigali kuri iki Cyumweru aho bagenzi babo bahagurukiraga kandi bakabaye barageze ku bigo byabo.

Imodoka za leta ni zo zakoreshwaga mu kugeza aba bana aho biga dore ko batari na benshi. Icyakora KAGERUKA Benjamin ushinzwe ubugenzuzi muri minisiteri y’uburezi avuga ko iyi ari imwe mu mbogamizi bahuye nayo.

Abasubiye ku mashuri bigaho mu mpera z’iki cyumweru basanzeyo bagenzi babo bo mu mwaka wa 3, uwa 5 n’uwa 6 w’amashuri yisumbuye nabo bari bamaze ibyumweru 3 basubukuye amasomo.

Ni mu gihe kandi hagitegerejwe ibyavuye mu bipimo 3000 byafashwe mu rwego rwo kureba uko icyorezo cya COVID19 cyifashe mu mashuri mu gihe amaze afunguye. Icyakora minisiteri y’uburezi iramara impungenge ababyeyi ivuga ko icyo cyemezo cyasuzumanywe ubushishozi.

Abanyeshuri basubukura amasomo kuva kuri uyu wa mbere ni abiga mu mashuri yisumbuye mu mwaka wa mbere, uwa kabiri n'uwa kane ndetse n'abageze muri level 3 mu mashuri y'ubumenyingiro, TVET.