Macron yasabye ko 7 Mata yemezwa mu Bufaransa nk’umunsi wo #Kwibuka

Perezidansi y’u Bufaransa yifuza ko tariki 7 Mata yajya iba umunsi wo Kwibuka Jenoside yakorewe Abatutsi.

Ni ubutumwa bwasohowe nyuma y’umunsi umwe gusa Perezida Macron atangaje ishyirwaho rya komisiyo izasesengura inyandiko icyo gihugu kibitse ku bikorwa byacyo mu Rwanda hagati ya 1990-1994, ngo hashyirwe ahabona ukuri ku ruhare rwacyo muri Jenoside yakorewe abatutsi.

Ni imyanzuro yakurikiye kwakira mu biro bye abayobozi b’Umuryango uharanira inyungu z’abarokotse Jenoside, Ibuka-France.

Muri ubwo butumwa, u Bufaransa bwatangaje ko "Perezida wa Repubulika yifatanyije n’abaturage b’u Rwanda n’abazize Jenoside hamwe n’imiryango yabo."

Iri tangazo rikomeza riti "Perezida wa Repubulika yashimye umurimo w’abarokotse Jenoside mu bikorwa byo kwibuka ndetse yifuje ko ko itariki ya 7 Mata yemezwa nk’umunsi wo Kwibuka Jenoside yakorewe Abatutsi."

Macron yari yatumiwe mu bikorwa byo Kwibuka ku nshuro ya 25 Jenoside yakorewe Abatutsi mu 1994 i Kigali, ariko yahagarariwe na Depite Hervé Berville ukomoka mu Rwanda. Yanagennye Minisitiri w’Imari n’ubukungu, Bruno Le Maire, ngo amuhagararire mu muhango wo kwibuka ku nshuro ya 25, Jenoside yakorewe Abatutsi, uzabera i Paris.

Uyu munsi kandi wahawe umwihariko mu Bufaransa kuko Televiziyo France 24 yatambukije imbonankubone igikorwa cyo kwibuka cyabereye i Kigali ndetse igena umwanya wihariye wo kuganira kuri Jenoside yakorewe Abatutsi, yifashisha impuguke zirimo Alain Gauthier.

Kuwa 23 Ukuboza 2003 nibwo Inteko Rusange y’Umuryango w’Abibumbye yemeje ko itariki ya 7 Mata ari Umunsi Mpuzamahanga wo kuzirikana kuri Jenoside yo mu Rwanda. Muri Mutarama 2018 iyi nteko yatoye gukosora iyo nyito,maze itariki ya 7 Mata iba Umunsi Mpuzamahanga wo kuzirikana kuri Jenoside yakorewe Abatutsi mu Rwanda.

Kwinjiza uyu munsi mu yindi yubahwa mu Bufaransa ni ikimenyetso gikomeye, harebwe ku mateka y’icyo gihugu mu Rwanda, mbere ya Jenoside ndetse n’igihe yakorwaga.