Dr Biruta yagiranye ibiganiro n’abayobozi mu Bwongereza barimo uw’Ubutabera

Mu ruzinduko yari arimo mu Bwongereza, Minisitiri w’Ububanyi n’Amahanga, Dr Vincent Biruta yagiranye ibiganiro n’abayobozi batandukanye muri iki gihugu, byibanze ku mibanire hagati y’ibihugu byombi.

Kuri uyu wa Gatanu, Dr Biruta yagiranye ibiganiro na Minisitiri ushinzwe Afurika, Vicky Ford byibanze ku myiteguro y’inama ya CHOGM igiye kubera mu Rwanda, ubufatanye mu bidukikije n’imihandagurikire y’ibihe.

Mu bandi bagiranye ibiganiro na Minisitiri Biruta harimo itsinda ry’Abadepite mu Nteko Ishinga Amategeko muri iki gihugu, ryari riyobowe na Minisitiri w’Ubutabera, Tom Pursglove.

Bimwe mu byo baganiriyeho harimo ubufatanye bw’ibihugu byombi mu bijyanye n’abimukira ndetse n’ubufatanye mu guteza imbere iterambere hagati y’u Rwanda n’u Bwongereza.

Uru ruzinduko rwasoje n’ibiganiro hagati ye n’intumwa yihariye mu by’ubukungu, Lord Popat mu bihugu birimo u Rwanda, Kenya, Uganda na RDC.

Baganiriye ku bufatanye mu by’ubucuruzi mu bijyanye n’ubuhinzi ndetse n’amahirwe y’ishoramari ari mu Rwanda.