Musanze: Uruyuki rwivuganye umunyapakistani

Mu yandi makuru adasanzwe, mu karere ka Musanze haravugwa urupfu rutunguranye rw'umunyapakistani Ali Saruwally, uzwi cyane ku izina rya ‘Mwarabu’ mu Mujyi wa Musanze akaba anahafite farumasi wapfuye amaze kudwingwa inzuki ebyiri.

Amakuru y’urupfu rwe yamenyekanye mu ma saa saba yo kuri uyu wa Gatatu ubwo abaturage bari bakubutse mu biganiro bisoza icyumweru cyo kwibuka ku nshuro ya 22 Jenoside yakorewe abatutsi.

Abaturanyi b'uyu mugabo babwiye Ikinyamakuru Izuba Rirashe, ngo ubwo we n’umukozi we umukorera mu rugo bari barimo gukora isuku mu ndabo zo mu rugo, inzuki ebyiri zavuye mu ‘gatiba’ afite mu gipangu cye ziramudwinga nuko nyuma yo kumukuramo imbori ahita yitaba Imana.

IP Gasasira Innocent, umuvugizi wa polisi mu Ntara y’Amajyaruguru yemeje amakuru y’urupfu rwa Ali Saruwally ariko ngo hakenewe ikizamini cyo kuwa muganga ngo hamenyekane icyamuhitanye kuko bikiri mu rujijo.