NGOMA: Yaguye mu musarani agiye kuzanamo telefone ngo ahabwe 4000 Rwf

Uwitwa Mpozembizi JMV wo mu Karere ka Ngoma, mu Murenge wa Remera, yaguye mu bwiherero ubwo yari agiye kuzanamo telephone ngo yishyurwe ibihumbi bine.

Iyi mpanuka yabaye kuwa Gatandatu w’icyumweru gishize; ariko kugeza kuri uyu wa Gatatu tariki 14 Werurwe imashini ikomeje gushakisha uko yagera ku murambo wa nyakwigendera.

Umunyamakuru wa RBA, Akimana Rathifah, avuga ko uyu nyakwigendera Mpozembizi yamanukiye mu gice cy’ijerekani iziritseho imigozi, bagenzi basigaye i musozi bayifashe. Akigeramo ngo yaratatse bagenzi bakuruye hazamuka ya jerekani gusa

Umunyamabanga nshingwabikorwa w’Umurenge wa Remera, Michel Nsanzuwera avuga ko  imashini  imaze iminsi itanu  icukura ubwo bwiherero bufite metero zisaga 20. Nyakwigendera Mpozembizi JMV wari ufite imyaka 41, asize umugore n‘abana batanu. 

Hagati aho nyir’ubwiherero Ziragora Jonas ari mu maboko ya  polisi y’igihugu mu Karere ka Ngoma.

Ku ruhande rw’abaturanyi bavuga ko iyi mpanuka yabahungabanyije ari nako bavanyemo amasomo yo kurushaho guha agaciro ubuzima.