Ntabwo mwantoreye kuyobora Sena ndi mu gitanda - Dr Iyamuremye

Kuri uyu wa Gatanu, Inteko Rusange ya Sena yemeje ubwegure bwa Dr Iyamuremye Augustin wari Perezida wayo wari umaze imyaka itatu ayiyobora.

Mbere yo gusuzuma no kwemeza ubwegure bwe, Dr Iyamuremye Augustin yabwiye abagize inteko rusange ko atari agishoboye gukomeza inshingano zo kubayobora kubera impamvu z'uburwayi, ashima ubufatanye bwa buri wese wamubaye hafi mu kazi ahereye ku ba senateri bagenzi be.

Yagize ati "Icyo mwantoreye ni ukugira ngo nteze imbere Sena, ntabwo mwantoreye ngo njye nyiyobora ndi mu gitanda."

Bamwe mu bagize Sena bababajwe n'uburwayi bwe ariko bishimira umusaruro mwiza Sena yagezeho ku bufatanye na Dr Iyamuremye Augustin.

Itegeko genga rigenga imikorere ya Sena riteganya ko iyo Perezida wa Sena avuye mu mwanya we asimburwa by'agateganyo na visi perezida ushinzwe  amategeko no kugenzura ibikorwa bya guverinoma mbere y'uko abagize inteko rusange ya sena bitoramo  umusimbura, byose bigakorwa mu gihe kitarenze iminsi 30.

Dr Iyamuremye Augustin yatorewe kuyobora Sena ku  tariki 17 Ukwakira 2019, akaba yarinjiye mu nteko nk'umwe mu bakandida bashyirwaho na Perezida wa Repubulika.

Jean Paul MANIRAHO