Abanyeshuri 58 basoje amasomo mu ishuri ryigisha gukora programu za mudasobwa mu Rwanda

AGEZWEHO

  • BNR yazamuye igipimo cy’inyungu iheraho inguzanyo banki z’ubucuruzi – Soma inkuru...
  • Abatega bava cyangwa bajya mu Mujyi wa Kigali barataka kubura imodoka – Soma inkuru...

Abanyeshuri 58 basoje amasomo mu ishuri ryigisha gukora programu za mudasobwa mu Rwanda

Yanditswe Jul, 24 2022 20:33 PM | 20,230 Views



Icyiciro cya mbere cy’Abanyeshuri 58 basoje amasomo mu ishuri ry’abacurabwenge mu gukora porogaramu za mudasobwa (Rwanda Coding Academy) riri mu karere ka Nyabihu. Aba banyeshuri baravuga ko ubumenyi bamaze imyaka itatu barirahuramo, ari ikibatsi gikomeye mu iterambere ry'ikoranabuhanga mu Rwanda.

Bahawe ubumenyi mu bijyanye no gukora porogaramu za mudasobwa (Software Engineering), gukora ikoranabuhanga rishyirwa mu bikoresho bisanzwe bigahinduka iby’ikoranabuhanga(Embedded system) cyangwa ibyitwa Internet of Things mu cyongereza, bigishwa n'amasomo y'umutekano w'ikoranabuhanga (Cyber security).

Buri wese aba afite imishinga y'ikoranabuhanga akoraho, irimo iye ku giti cye cyangwa iy'abamuhaye akazi bo mu Rwanda no hanze yarwo, hakaba n'abamaze gutangiza kompanyi  z'ikoranabuhanga ku giti cyabo. 

Ntwari Egide w’imyaka 19 abinyujije muri kompanyi yise Yombi Lab Ltd, yakoze ikoranabuhanga riboneka ku rubuga rwa internet rwitwa yombi.rw, rifasha abunganizi mu mategeko kwakira no kubika neza ibirego by’abakiliya babo bakabikurikirana hadakoreshejwe impapuro kugeza imyanzuro y’inkiko ibonetse.

Imwe mu mishinga y’aba banyeshuri yatangiye gutanga umusaruro. 

Shallon Kobusinge umwe mu banyeshuri 8 bakoze ikoranabuhanga ryorohereza imicungire y’abakozi n’imikoreshereze y’umutungo by’ikigo cy’igihugu gishinzwe guteza imbere ubumenyi ngiro (RTB) nawe hari icyo byahinduye ku buzima bwe.

Aba banyeshuri bo muri Rwanda Coding Academy bigishijwe bahereye mu mizi, indimi 9 zikoreshwa mu rwego mpuzamahanga mu gukora program za mudasobwa bizwi nka programming languages, bagahamya ko bakurikije ubumenyi bafite nta gushidikanya ko bihura n'impamvu iri shuri ryashyizweho.

Gusa aba banyeshuri barifuza ko bashyirirwaho gahunda yihariye muri Kaminuza, yabafasha kurushaho gutyaza ubumenyi bamaze kubona.

Kuri ubu hari kaminuza ebyiri zo mu Rwanda zashishakarijwe gutangiza gahunda yihariye, izakirwamo abanyeshuri barangije muri iri shuri.

Umuyobozi w’ishuri ry’abacurabwenge muri mudasobwa rya Rwanda Coding Academy Dr. Niyigena Papias, avuga ko mu mwaka utaha w’amashuri, bazahita batangirana nayo.

Ishuri rya Rwanda Coding Academy rizobereye mu gutyaza abacurabwenge muri mudasobwa ryatangiye mu mwaka wa 2019. Ryigamo abanyeshuri barangije icyiciro rusange cy’amashuri yisumbuye, ari indashyikirwa batsinze ibizamini by’amasomo y’imibare, ubugenge n’icyongereza. 

Abaryigamo bishyurirwa byose na Leta, rikaba rifite intego yo gufasha igihugu kugabanya ikiguzi gitangwa ku mpuguke mu ikoranabuhanga zituruka hanze, no kuba umusemburo w'ikoranabuhanga mu Rwanda no mu karere ruherereyemo. 

Kugeza ubu buri mwaka ryakira abanyeshuri bashya 60 gusa biteganyijwe ko mu mwaka w’amashuri utaha hazakirwa abanyeshuri 120 kuko hazaba hafunguwe irindi shami mu karere ka Muhanga.




Ba uwambere gutanga igitekerezo

Tanga igitekerezo:



RSS FEED

Minisitiri Uwamariya yagaragaje akamaro ko guhanga udushya ku barimu

Abarimu n'abanyeshuri bo muri za kaminuza ziherutse gufungwa burundu bari

Uzashaka kwimura umwana atabikwiriye azabihanirwa-Min. Mutimura

Hagaragajwe imbogamizi zikibangamiye ireme ry’uburezi

INAMA KU BANYESHURI MBERE YO GUHITAMO AMASHAMI BAZIGAMO

Abarimu n’abanyeshuri barasaba ko ingengabihe yasubizwa muri Nzeri