Nyanza: Amashyushyu ni yose! Biteguye igitaramo i Nyanza Twataramye

Abatuye mu Karere ka Nyanza baravuga ko bakiriye neza kuba igitaramo "I Nyanza twataramye" kigiye kongera kuba nyuma y'imyaka itatu kitaba.

Muri iki gitaramo ngo bungukiramo byinshi bijyanye n'amateka yo hambere ndetse n'indangagaciro zibereye Umunyarwanda.

I Nyanza twataramye ni igitaramo ndangamuco Nyarwanda kiba buri mwaka hagamijwe gusobanukirwa uko mu muco nyarwanda bataramaga no gususurutsa abatuye Nyanza n'abahagenda. Hari hashize imyaka itatu iki gitaramo kitaba kubera COVID-19.

Gusa muri uyu mwaka, iki gitaramo kizongera, kikaba cyarahujwe n'umuganura.

Abatuye mu Karere ka Nyanza, bavuga ko iki gitaramo bacyungukiramo byinshi byendeye ku muco n'amateka yo hambere.

I Nyanza twataramye ngo ntiyungura ubumenyi n'amateka gusa kuko n'abacuruzi baboneraho umwanya wo gucuruza bitewe n'umubare w'abantu baba bitabiriye iki gitaramo.

Umuyobozi w’Akarere ka Nyanza Ntazinda Erasme avuga ko kuba iki gitaramo cyari kimaze igihe kitaba atari uko cyavuyeho, ahubwo ngo byatewe n’ibihe bikomeye byo kwirinda Covid19.

Igitaramo I Nyanza twataramye cyatangijwe mu mwaka wa 2014, maze mu mwaka wa 2016 gihuzwa n'umunsi w'umuganura.

Jean Pierre Ndagijimana