Nyaruguru: Isura yo kwizihiza umunsi mukuru wa noheli mu cyaro

Abatuye mu bice by’icyaro baravuga ko mu kwizihiza Noheli y’uyu mwaka bitandukanye cyane n’uko bajyaga bayizihiza, dore ko wasangaga benze amayoga, bakabaga amatungo mu miryango hirya nohino bagakora ibirori. Gusa kuri iyi nshuro bayizihirije mu ngo  aho wasangaga no ku du centre dukunze gushyuha nta rujya n’uruza ruhari.

Ubusanzwe mu bice by’icyaro kuri Noheli wasangaga abaturage bajya gusenga, bavayo bakajya kwinezeza mu du centre duherereye aho batuye, abandi bagateranira mu miryango itandukanye bagasabana.  

Abatuye mu mirenge ya Ngera Ngoma mu karere ka Nyaruguru baravuga ko kuri iyi Noheli y’umwaka wa 2020, ibintu byahindutse kuko haba mu de centre, mu ngo ndetse no mu nsengero abantu  si benshi nk’uko byabaga bimeze mu myaka yashize. Ibi ngo byatewe no kubahiriza amabwiriza yo kwirinda Covid19, aho nta bantu bagomba guterana ari benshi ngo basabane kuko bishobora kubaviramo kwanduzanya iki cyorezo.

Aba baturage kandi bagaragaza ko no kuba hari aho insengero zitaremererwa gukora , ahandi hakaba hajyamo umubare muto, na byo byabaye umwihariko wo kwizihiza noheli muri uyu mwaka ugereranyije na mbere wasangaga insengero zakubise zikuzura.

Si muri ibi bice by’icyaro gusa abantu batakoze ibirori byo kwizihiza Noheli, kuko no mu mijyi wasangaga urujya n’uruza rw’abantu rwagabanutse ugereranyije n’uko abantu bajyaga bizihgiza Noheli. Ibi byose ariko byatewe no kubahiriza amabwiriza yo kwirinda, icyorezo cya Covid19, hirindwa ko abantu bashobora kwegerana cyane bityo bakanduzanya.