PEREZIDA PAUL KAGAME YIJEJE RAMAPHOSA UBUFATANYE

Perezida wa Repubulika Paul Kagame kuri uyu wa mbere yashimiye mugenzi we wa Afurika y'Epfo Cyril Ramaphosa ku bw'intsinze ishyaka rye rya ANC riherutse kwegukana mu matora y'abadepite.

Mu butumwa yanditse kuri Twitter ye Perezida Paul Kagame yabwiye mugenzi we Perezida Cyril Ramaphosa ko ANC yegukanye itsinzi ibikwiriye, yamwijeje gukomeza ubufatanye bw'impande zombi no kurushaho kubushimangira mu nyungu z'abatuye ibihugu byombi.

Mu ijambo yagejeje ku baturage nyuma yo gutangazwa kw’amajwi, Perezida Cyril Ramaphosa yavuze ko agiye gusukura ishyaka riri ku butegetsi rya African National Congress (ANC), agakuramo imigirire mibi kugira ngo arwanye ruswa.

Imibare ya nyuma y’ibyavuye mu matora y'abadepite muri Afurika y'Epfo igaragaza ko ANC yayatsinze n’amajwi 58%

Aya amajwi yatumye ANC iza imbere y'andi mashyaka atavuga rumwe n’ubutegetsi arimo irya Democratic Alliance (DA) ryabonye amajwi 21% riri ku mwanya wa kabiri na Economic Freedom Fighters (EFF) ryabaye irya gatatu n’amajwi 11%.