Perezida Kagame ari i Geneve mu Busuwisi mu nama y’ubufatanye mu iterambere

Perezida wa Repubulika Paul Kagame ari i Geneve aho yitabira inama y’ubufatanye mu iterambere 2022.

Kuri iki gicamunsi, Perezida Kagame aritabira umuhango wo gutangiza iyi nama, ihuza abafatanyabikorwa kugira ngo batekereze ku bufatanye bufatika mu iterambere hagamijwe kugera kuri gahunda ya 2030 y’ingamba z’iterambere rirambye.

Perezida Kagame ari kumwe na Perezida w’u Busuwisi Ignazio Cassis, Perezida Maia Sandu wa Moldavia, H.E. Amina J Mohammed, Umunyamabanga Mukuru wungirije w’Umuryango w’Abibumbye n’abandi arageza ijambo ku bitabiriye iyi nama.

Iyi nama igamije kubaka imyumvire imwe ku ngamba zafatwa, harimo kubaka icyizere no gukorera hamwe mu gihe hagaragaye ibibazo ku isi.

Iyi nama itegurwa n’Ihuriro rigamije ubufatanye mu iterambere (GPEDC), ihuza guverinoma, abafatanyabikorwa mu iterambere ry’ibihugu ndetse n’ibihugu, imiryango itegamiye kuri Leta, abikorera, abagiraneza n’abandi.

Ihuriro GPEDC rigizwe n’ibihugu 161 n’imiryango 56, ryubakiye ku mahame ane, kuba ibihugu bigira ibyabyo inzira y’iterambere, kwibanda ku bisubizo, ubufatanye mu iterambere ridaheza, gukorera mu mucyo no kubazwa inshingano.