Yanditswe Mar, 04 2021 09:48 AM | 147,744 Views
Perezida w’u Rwanda Paul Kagame yatangaje ko kuba inkingo za Covid-19 zari zimaze igihe zitegerejwe zikomeje kugera mu bihugu bya Afrika ari inkuru nziza. Ibi binashimangirwa n’abaturage bari mu matsinda azakingirwa ku ikubitiro by’umwihariko abageze mu zabukuru n’abakozi bo kwa muganga.
Mbere y’uko iki cyumweru kirangira bamwe mu bagize amatsinda afite ibyago byinshi nyo kwibasirwa na COVID-19 mu Rwanda bazakingirwa iki cyorezo .Icyiciro cya mbere cy’inkingo za COVID-19 cyageze mu Rwanda kuri uyu wa Gatatu.Kuri twitter, Perezida w’u Rwanda Paul Kagame yanditse ko iyi ari inkuru nziza ku mugabane wa Afrika.Umukuru w’igihugu yashimangiye ko izi nkingo zari zimaze igihe zitegerejwe zikenewe mu buryo bwihutirwa haba ku bihugu byiteguye mbere ndetse n’ibicyitegura.
Minisiteri y’ubuzima igaragaza ko inzego zibishinzwe zizi neza abagaomba guherwaho mu gukingira.
Mu byiciro bizaherwaho mu gukingira harimo, abakora mu rwego rw' ubuzima kuva ku mujyanama w'Ubuzima kugera ku mukozi wo mu bitaro bya Kaminuza, abakozi batandukanye bakora mu bikorwa byo kwirinda COvid 19, abakuze barengeje imyaka 65 y'amavuko n' abasanganywe izindi ndwara kugira ngo barindwe kwandura, abarwaye indwara zidakira, abashinzwe umutekano n’abandi.
Dufashe nk'urugero ku cyiciro cy'abageze mu zabukuru,imibare itangwa na Ministeri y'ubuzima igaragaza ko kugeza ku wa kabiri w'iki cyumweru,mu bantu ibihumbi 19,111 byamenyekanye ko banduye Covid 19 mu Rwanda kugeza ku wa 2 Werurwe 2021,abageze mu zabukuru barengeje imyaka 60 y'amavuko ari 1386.
Nubwo uwo mubare wagaragara nkaho ari muto ariko, iyo bigeze mu bahitanwa n'icyo cyorezo, abageze mu zabukuru akenshi baba banasanganywe izindi ndwara, ni bo baza ku isonga.
Mu bantu 265 bamaze guhitanwa n'icyorezo cya Covid 19 mu Rwanda, 179 muri bo ni abagabo na ho 86 ni abagore.
Muri abo abageze mu zabukuru ni bo bibasiwe cyane kuko mu bamaze kwitaba Imana bose bazize Covid 19,hafi 3/4 byabo ni ukuvuga abantu 156 bafite hejuru y'imyaka 60 y' amavuko.
Gukomererwa cyane na Covid 19 ku bageze mu zabukuru bishimangirwa kdi na MInistri w'UbuzimaDr. Daniel Ngamije. Ati "Mu bazahazwe cyane bakaremba, bakajya mu bitaro ndetse bamwe bakanapfa usanga uhereye ku myaka 50 kuzamuka rwose kurwara covid ni ikibazo gikomeye. Uko tugenda dukura, dusaza, ni na ko izo ndwara zindi zigenda ziza,ari za kanseri, umuvuduko w'amaraso ukabije, diyabete n'indwara z'ubuhumekero n'izindi iyo covid na yo igiyeho usanga uwo muntu afite ibyago byo gupfa birengeje iby'umuntu mutoya."
Kugera mu Rwanda ku inkingo za Covid 19 ni inkuru nziza ku bazakingirwa kw' ikubitiro.
Umuyobozi w'amashami y'Umuryango w'Abibumbye mu Rwanda Fodé Ndiaye we yashimye umuhate u Rwanda rushyira mu kubaka inzego z'ubuzima zitajegajega ndetse no kurinda abaturage Covid 19
Yagiz ati "U Rwanda ni kimwe mu bihugu biri mu nzira y'amajyambere byashyizweho ibikenewe bituma ruhabwa urukingo rwa Pfizer rubikwa mu bukonje bwinshi,ibintu bigaragaza kwitegura kwitegura bikomeye no kwiyemeza."
Ministiri w'Ubuzima, Dr.Daniel Ngamije avuga ko inkingo za Covid19 zaje ubuziranenge bwazo bwitaweho kandi zizagera kuri benshi.
Ati "Abaturage batekane, dufite gahunda yo kugira ngo buri Munyarwanda wese ugomba gukingirwa azakingirwe bitarenze umwaka utaha mu kwezi kwa 6. Abaturage miliyoni 7 n'ibihumbi 800 barenga tugomba kubakingira kugeza icyo gihe. Izi nkingo zirizewe nta muntu ugomba kuzigiraho impungenge, zimaze gutangwa mu bihugu byinshi, kuva mu kwezi kwa 12, i Burayi no muri Amerika nta kibazo na kimwe twigeze tubona. Zifite uruhushya rw'Umuryango w'Abibumbye kandi binyura mu nzira ndende kurubona. Twirinde abantu bashaka kuvangira iyi gahunda bazana ibihuha bidafite ishingiro bakura mu myemerere yabo cyangwa ahandi hantu, urukingo rurizewe."
Uretse inkingo za Covid 19 zisaga ibihumbi 342 zaje kuri uyu wa gatatu zirimo iza Astrazeneca 240 n’iza Pfizer zirenga gato ibihumbi 102. Ministeri y'ubuzima ivuga ko mu ntangiriro z' icyumweru gitaha,u Rwanda ruzakira izindi nkingo za COvid 19 zirenga ibihumbi 500, hakaba hari gahunda yo kwakira izo nkingo buri kwezi.
Gusa iyi minisiteri ivuga ko abana bafite munsi y'imyaka 18 y' amavuko batarebwa n'izi nkingo.
Gahunda ihuriweho n'ibihugu by'isi hagamijwe gushaka inkingo za COvid 19,Covax Initiative iteganya ko byibura buri gihugu cyahabwa inkingo zakingira byibura 20% by' abagituye.
Carine UMUTONI
U Rwanda na Georgia byemeranyije ubufatanye mu bya politiki na diplomasi
Apr 17, 2024
Soma inkuru
Hashyizweho uburyo bwo kwireba no kwiyimura kuri lisiti y’itora hakoreshejwe ikoranabuhanga
Apr 17, 2024
Soma inkuru
FERWAFA yanyuzwe n'umusaruro w'Amavubi mu mezi ane ashize
Apr 17, 2024
Soma inkuru
RHA yahumurije abubakishije amakaro yo mu bwogero ku nkuta z’inzu z’ubucuruzi
Apr 17, 2024
Soma inkuru
Gakenke: Imirimo yo kubaka Umudugudu w’Icyitegererezo uzatuzwamo abahoze mu manegeka irarimban ...
Apr 17, 2024
Soma inkuru
Karongi: Inzobere z’abaganga ba RDF zatangiye kuvura abaturage ku buntu
Apr 16, 2024
Soma inkuru
Abamotari batakambye ku biciro by’ubwishingizi birushaho gutumbagira
Apr 16, 2024
Soma inkuru
Rubavu: Abarokotse Jenoside baravuga ko ubuvuzi bahawe na Leta bwatumye bagarura icyizere
Apr 16, 2024
Soma inkuru