Perezida Kagame yakuye ku buminisitiri Gen Nyamvumba wari ubumazeho hafi amezi 6

Ashingiye ku biteganywa n'Itegeko Nshinga rya Repubulika y'u Rwanda ryo mu 2003 ryavuguruwe mu 2015 cyane cyane mu ngingo yaryo  ya 116, kuri uyu wa Mbere Perezida wa Repubulika Paul Kagame yakuye mu mirimo General Patrick Nyamvumba wari Minisitiri w'Ubutekano mu Gihugu.

Itangazo ryaturutse mi Biro bya Minisitiri w'Intebe rivuga ko gukurwa ku mirimo kwa General Nyamvumba byaturutse ku iperereza riri kumukorwaho.

Itangazo rikaba rivuga ko General Nyamvumba yasubijwe mu Ngabo z'u Rwanda mu gihe hategerejwe ibizava mu iperereza.

Tariki ya 4 Ugushyingo 2019 ni bwo General Nyamvumba yagizwe Minisitiri w'Umutekano mu Gihugu avuye ku mwanya w'Umugaba Mukuru w'Ingabo z'u Rwanda. Akaba yararihiye izo nshingano tariki ya 14 Ugushyingo 2019.