Perezida Kagame yihanganishe abatuye Kenya kubera urupfu rwa Mwai Kibaki

Perezida Paul Kagame yihanganishije abaturage ba Kenya n’Umuryango wa nyakwigendera Mwai Kibaki wayoboye iki gihugu, witabye Imana kuri uyu wa Gatanu azize uburwayi.

Perezida wa Kenya Uhuru Kenyatta, yatangaje ko Kibaki w’imyaka 90 yitabye Imana azize uburwayi, akaba kandi yavuze ko igihugu kiri mu cyunamo kugeza igihe azashyingurirwaho.

Mu butumwa yanyujije ku rukuta rwe rwa twitter, Perezida Kagame yagize ati “Nihanganishije abaturage ba Kenya ndetse n’umuryango wa Perezida Kibaki. Ubwitange bwe mu guteza imbere ubukungu bwa Kenya ndetse n’akazi yakoze mu kwishyira hamwe kw’Akarere bizibukwa mu bisekuru byinshi. Abanyarwanda bifatanyije n’Abanya-Kenya muri ibi bihe.”

Mwai Kibaki yavutse ku wa 15 Ugushyingo 1931, aba Perezida wa Gatatu wa Kenya guhera mu Ukuboza 2002 kugera muri Mata 2013.

James Habimana