Perezida Kagame yitabiriye inama yahuje Afurika n'u Bushinwa yize ku bufatanye mu guhangana na COVID19

Yanditswe Jun, 18 2020 08:06 AM | 34,310 Views

Perezida wa Repubulika Paul Kagame kuri uyu wa Gatatu yifatanije n'abandi bakuru b’ibihugu by’Afurika mu nama idasanzwe hagati y’Afrika n’u bushinwa. Aba bakuru b’ibihugu baganiriye ku bufatanye bw’impande zombi mu guhangana n’icyorezo cya Covid-19.

Iyi nama yari iyobowe na Perezida Cyril Ramaphosa w’Afurika y’Epfo ari na we uyoboye umuryango w’Afrika yunze Ubumwe ndetse na Macky Sall uyoboye ihuriro rihuza u Bushinwa n’Afrika ndetse na Perezida Xi JinPing w’ubushinwa.

Mu ijambo yagejeje ku bitabiriye iyi nama, Perezida Kagame yagaragaje ko ubufatanye bw’impande zombie muri ibi bihe ari ingenzi.

Yagize ati “Guverinoma ya Republika ya rubanda y’u bushinwa n’urwego rw’abikorera mu Bushinwa, bahaye Afurika ibikoresho by’ingenzi birimo ibyo gupima n’ibyo kwifashisha kwa muganga, mu gihe byari bikenewe cyane. Ibi byafashije mu gutabara ubuzima kandi ni cyo bikomeje kumara. Turashima kandi inkunga u Bushinwa buherutse kwemera gutanga ingana na miliyari 2 z’amadolari ngo zifashe umugabane mu guhangana na covid-19 ndetse n’inkunga irebana n’umwenda ku bihugu 20 bikize ku isi.

Ni inama yakozwe mu buryo bw’ikoranabuhanga rya videwo maze bumvikana ko impande zombi ko zigomba gufatanya mu guhangana nicyorezo cya Covid-19.