Perezida wa Madagascar Andry Rajoelina yaje mu ruzinduko rw'akazi mu Rwanda - Amafoto

Kuri uyu mugoroba nibwo indege imuzanye yasesekaye ku kibuga cy’indege mpuzamahanga cya Kigali I Kanombe aho yakiriwe na Minisitiri w’ Ububanyi n’amahanga w’ u Rwanda Dr Vincent Biruta.

Uru ruzinduko rwa Perezida Andry Rajoelina mu Rwanda rukurikiye urwo Perezida Paul Kagame, yagiriye muri Madagascar mu kwezi kwa 6 muri 2019 aho bari bitabiriye ibirori byo kwizihiza isabukuru y’ubwigenge bwa Madagascar, isabukuru yari yizihijwe ku nshuro ya 59.

U Rwanda na Madagascar bifitanye amasezerano y'ubufatanye yasinywe hagati y'ibigo by'iterambere mu bihugu byombi mu kwezi kwa Gashyantare muri 2019.

Ni amasezerano agamije ishoramari ku mpande zombi ndetse no gusangira ubunararibonye bugamije kubaka ubushobozi n'ubunyamwuga muri ibi bigo byombi.

Biteganijwe ko no muri uru ruzinduko rwa Perezida Rajoelina mu Rwanda ibihugu byombi bizasinyana amasezerano anyuranye y’ubufatanye mu nzego zitandukanye.

Perezida Andry Rajoelina yakiriwe na Minisitiri w’ Ububanyi n’amahanga w’ u Rwanda Dr Vincent Biruta. Photo: GoR