RIB yerekanye abantu 10 barimo na Mutwarasibo bakekwaho kwenga ‘liqueur’ z’inkorano i Kigali

Urwego rw’Igihugu rw’Ubugenzacyaha, RIB, rwerekanye abantu 10 barimo n’Umuyobozi w’Isibo mu Murenge wa Gisozi mu Karere ka Gasabo bakekwaho gukora inzoga zirimo izo mu bwoko bwa 'Liqueur' z’inyiganano.

Kuri uyu wa Kabiri, tariki ya 22 Ukwakira 2024 ni bwo abakekwa uruhare mu kwenga inzoga z’inkorano mu buryo butemewe beretswe itangazamakuru.

RIB yatangaje ko izo nzoga bazikoraga bigana iz’inganda zemewe mu Rwanda ndetse bakanahimba ibyangombwa by’ubuziranenge cyangwa ibirango bigaragaza ko zasoze.

Umuvugizi w’Urwego rw’Igihugu rw’Ubugenzacyaha, RIB, Dr Murangira Thierry, yavuze ko mu bafashwe harimo n’Umuyobozi w’Isibo, aho inzoga zakorerwaga mu nzu ye.

Izi nzoga zafatiwe mu Murenge wa Gisozi mu Karere ka Gasabo nyuma y’igenzura ryakozwe ku bufatanye n’Ikigo cy'Igihugu gishinzwe Ubuziranenge bw'Ibiribwa n'Imiti, Rwanda FDA.

Abazikoraga uko ari batatu bakoreshaga ibinyabutabire bitemewe, bagahimba ibirango by’izindi nganda zemewe mu Rwanda, icy’ubuziranenge ndetse bakigana n’ibirango by’Ikigo cy’Igihugu gishinzwe Imisoro n’Amahoro, RRA.

Mu batawe muri yombi harimo n’abandi bantu barindwi bakurikiranywe nk’ababafatanyacyaha muri iyi dosiye.

Umuyobozi w’Ishami rishinzwe Ubugenzuzi bw’Ibiribwa mu Kigo cy'Igihugu gishinzwe Ubuziranenge bw'Ibiribwa n'Imiti, Rwanda FDA, Dr Eric Nyirimigabo, yavuze ko izi nzoga zikimara gupimwa basanze zirimo ibinyabutabire bigira ingaruka mbi ku buzima bw’abaturage birimo n’ibitemerewe gukoreshwa mu Rwanda.

Urwego rw’Igihugu rw’Ubugenzacyaha, RIB, rwagaragaje ko izi nzoga zafashwe ziri mu bwoko butandukanye zingana na litiro 347, zifite agaciro ka miliyoni zisaga 30. Uwakoraga izi nzoga akimara gufatwa yemereye umugenzacyaha kumuha ruswa ya miliyoni 7 Frw ndetse yari amaze gutangaho miliyoni 5 Frw ngo afungurwe ariko umugenzacyaha ntiyabyemera.

Jean Paul Turatsinze