RRA irakangurira abaturage kwishyura umusoro w'ubukode bw'ubutaka hakiri kare

Ubuyobozi bw'ikigo cy'imisoro n'amahoro buravuga ko butazihanganira umuturage wese warengeje itariki yo gutanga umusoro ku bukode bw'ubutaka kuko bigaragara ko ubwitabire bukiri hasi. Ibi biravugwa mu gihe bamwe mu baturage bavuga ko bacikanywe no gutanga uyu musoro bitewe n'impamvu zitandukanye zirimo ikorana buhanga ryabagoye ndetse n'imirongo yari miremire ku munsi wanyuma.

Jean Marie Vianney GAKWERERE Komiseri wungirije ushinzwe imisoro n’amahoro avuga ko iteka rya perezida wa repubulika  riteganya ko umuturage wese urengeje italiki yo gutanga ubukode bw'umusoro ku butaka acibwa 10% by'amafaranga agomba kwishyura uko agenda yiyongera hakajyaho n'inyungu ya 1,5% buri kwezi y'ubukererwe .

Mu ngengo y'imari  y'umwaka wa 2016  ibibanza miliyoni 1  n'ibihumbi 78 nibyo byagomba gutangirwa umusoro ku bukode, ungana  n'amafaranga miliyari 6. Mugihe mu ngengo y'imari y'umwaka wa 2015 bakiriye amafaranga y'ubukode bw'ibibanza angana na  miliyari 3 na miliyoni 800, imibare y'ibyavuye mu  ngengo y'imari y'uyu mwaka turangije ikazatangazwa hagamijwe kureba niba intego yabo yaragezweho .