RSB mu nama na EAC ku guhuza amabwiriza y'ubuziranenge bw'ibinyampeke mu karere

Komite z'ubugenzuzi mu karere ka Afurika y'uburasirazuba zirimo kuvugurura amwe mu mabwiriza y'ubuziranenge ku binyampeke. Ibi bigamije koroshya ubucuruzi bwambukiranya imipaka, no kongera ikizere mu bacuruzi hano mu karere ka Afurika y'uburasirazuba.

Mu nama y'iminsi itanu ihuje ibigo by'ubuziranenge muri aka karere, abashakashatsi mu by'ubuziranenge n'abacuruzi, harasuzumwa amabwiriza 9 muri 22 ku binyampeke yemejwe n'umuryango w'afurika y'uburasirazuba kugira ngo avugururwe, bitewe n'uko mu gihe cyo kuyashyira mu bikorwa, hagiye hagaragara ibibazo. 

Nko ku ruhande rw'u Rwanda, ngo bimwe mu bibazo byagaragaye muri ayo mabwiriza, harimo ubuhehere bw'ibigori. Antoine MUKUNZI, umuyobozi w'ishami rya 'laboratoires' zipima ubuziranenge mu kigo cy'igihugu cy'ubuziranenge, avuga ko amabwiriza ashyirwaho agomba kuba areba inyungu ku mpande zose.