RUBAVU: IMIRAMBO 15 Y'ABANYEKONGO YABONETSE MU RWANDA

AGEZWEHO

  • Kuvana impunzi muri Milles Collines n'urupfu rwa Cpt Mbaye Diagne wo muri MINUAR – Soma inkuru...
  • Uruhare ntashidikanywaho rw'Abanyarwandakazi mu butumwa bw'amahoro bwa Loni – Soma inkuru...

RUBAVU: IMIRAMBO 15 Y'ABANYEKONGO YABONETSE MU RWANDA

Yanditswe Apr, 21 2019 09:55 AM
3,280 Views



Mu karere ka Rubavu habonetse imirambo 15 y'abanyekongo baherutse kurohama mu mpanuka y'ubwato yabereye mu kiyaga cya Kivu ku ruhande rwa Repubulika iharanira demokarasi ya Kongo. Iyo mirambo yashyikirijwe ubuyobozi bw'umujyi wa Goma, ndetse akarere ka Rubavu gafata umwanzuro wo kuba gahagaritse ibikorwa byo koga n'uburobyi mu kiyaga cya Kivu.

Iyo mirambo y'abanyekongo yabonetse hagati mu kiyaga cya Kivu ku ruhande rw'u Rwanda mu bice by'umurenge wa Nyamyumba mu karere ka Rubavu. Nk'uko tubikesha ubuyobozi bw'aka karere, yatangiye kugaragara  mu ijoro rishyira kuri uyu wa gatandatu, hahita hatangira ibikorwa by'ubutabazi bwo gushakisha indi mirambo, kugeza ubwo twakoraga iyi nkuru hari hamaze kuboneka imirambo y'abantu 15.

Murenzi Janvier, umuyobozi w'akarere ka Rubavu wungirije ushinzwe iterambere ry'ubukungu yihanganishije abaturanyi bo muri Repubulika iharanira Demokarasi ya Kongo, ndetse iyo mirambo ishyikirizwa ubuyobozi bw'umujyi wa Goma, mu gikorwa cyabereye kuri plage ya Gisenyi.


Umuyobozi w'umujyi wa Goma Muisa Kense Thimothee yashimiye leta y'u Rwanda kubera ubutabazi bwakozwe avuga ko bagikomeje gushakisha abandi baburiwe irengero.

Muisa Kense Thimothee yagize ati "Ntabwo turashobora kumenya imyirondoro y'aba bantu, uretse indangamuntu 1 yabonetse mu mwambaro w'umurambo w'umugabo, kandi mu mirambo yabonetse y'abagore twasanzemo uwari utwite, tukaba dushimira leta y'u Rwanda uburyo inzego zinyuranye zadutabaye muri ibi byago.

Cyokora ibikorwa byakorerwaga mu kiyaga cya Kivu nko koga n'uburobyi byahagaritswe ku ruhande rw''akarere ka Rubavu kugeza igihe hazasohokera andi mabwiriza.

Mu ntangiriro z'icyumweru gishize, nibwo Repubulika iharanira Demokarasi ya Kongo yatangaje ko abantu bagera ku 150 baburiwe irengero nyuma yaho ubwato barimo burohamye mu kiyaga cya Kivu hafi y'ahitwa Kalehe, buvuye mu ntara ya Kivu y'amajyaruguru.


Inkuru ya Saadah HAKIZIMANA




Ba uwambere gutanga igitekerezo

Tanga igitekerezo:



RSS FEED

Miliyari 11 z’amanyarwanda zigiye kubakishwa ibyambu ku Kivu

Kubura aho bagurira imitego yemewe bibangamira uburobyi mu Kivu

AMAFOTO: Madame wa Perezida Tshisekedi yasoje uruzinduko yagiriraga mu Rwanda

KWIBUKA25: Perezida wa Niger, n'uwa Congo Braza baje mu Rwanda

Symbion yiyemeje gutanga Megawatt 56 z'amashanyarazi ziva mu Kivu

Perezida Tshisekedi wa DRC arateganya gukorera uruzinduko i Kigali