Rusizi: Ni iki cyateye ikama ry’ikidendezi cy’amashyuza?

Nyuma y'aho ikidendezi cy'amashyuza cyari kiri mu Karere ka Rusizi gihindukiye umugezi utemba, abaturiye aya mashyuza bavuga ko ari igihombo kuyabura ariko bakaba bavuga ko bishoboka kuyatangira ntakomeze kumanuka nk'adafite gitangira.

Turerekwa n'aba basaza  bimwe mu bice by'ingenzi bigize aha hantu hitwa ku Mashyuza.

Iyi nkuru turayikorera mu Murenge wa Nyakabuye, Akagari ka Mashyuza kitiriwe aya mazi ashyushye yipfupfunukira mu butaka akagera imusozi acumbeka umwotsi anashyushye,akitwa amashyuza, akaba yari yarakoze ikidendezi kimeze nk'ikiyaga aha hantu, ibintu  bimaze  imyaka  kugeza ubu utapfa kubona ukubwira ari ingahe kabone n'abasaza bavuga ko barengeje imyaka 70 ariko ngo na bo bakaba baravutse bayabona.

Mu gitondo cyo ku wa mbere  cya kiyaga cy'amashyuza cyatangiye kubura. Aba basaza bari bahazindukiye nk'uko bisanzwe

Hari bamwe bibwiraga ko  isoko y'amashyuza ubwayo yakamye. Oya si ko bimeze,abubwo icyari ikidendezi cyayo ni cyo cyahindutse umugezi utemba. N'ubundi yari asanzwe atemba ariko hasohokagamo make,none umwobo yasohokeragamo biravugwa ko wabaye munini maze asohoka adafite gitangira.

Kubona aka kagezi kadafite na metero eshatu z'umurambararo kasimbuye ikiyaga cyari ku buso hafi hegitari nzima, abaturage byabashobeye,gusa hari ibyo bakeka.

Abantu benshi bari kuza kureba ibyabaye.Inzego z'umutekano ziri kubakumira ngo hatagira uwakandagiramo akarigita dore ko bigaragara ko aho icyo kidendezi cyari kiri hatangiye gutenguka. Abayaturiye batangiye kubara igihombo

Aya mashyuza yari ku buso bukabakaba hegitari. Ku munsi, abantu babarirwa muri 300 bavuye imihanda yose bivugwa ko bazaga kuharuhukira,abandi bagatwara aya mazi ashyushye bafataga nk'umuti w'indwara zitandukanye. Akimara kuroboka yahise ajya kurema ikindi kidendezi hepfo y'umuhanda ahacukurwa kariyeri ya CIMERWA.

Theogene TWIBANIRE