U Rwanda rugiye kwakira ihuriro mpuzamahanga ry'abanditsi b’ibitabo mu rurimi rw'igifaransa

Mu ntangiriro z’ukwezi gutaha kwa gatatu u Rwanda ruzakira ku nshuro ya mbere ihuriro mpuzamahanga ry'abanditsi b’ ibitabo mu rurimi rw'igifaransa.

Rizitabirwa n'abanditsi baturutse mu bihugu 11 hirya no hino ku isi.

Ambasaderi w'uBufaransa mu Rwanda Antoine Anfré avuga ko  iri huriro ryateguwe muri gahunda ndende y’ ubutwererane hagati y’ u Rwanda n’ u Bufaransa ndetse no mu rwego rwo guteza imbere umuco wo gusoma ndetse no kwandika mu Rwanda.

Yagize ati «Intego navuga ko ari uguteza imbere ibyerekeye ubuvanganzo bw’igifaransa n’ibindi bijyana no kwandika  ibitabo. Muri igihugu gifite inzu zandika ibitabo ariko zitaratera imbere cyane icyo rero bigomba gufata intera. Iki kigo ndangamuco cy’abakoresha igifaransa kigomba gutanga umusanzu muri urwo rwego, ni inshingano gifite kandi ni icyerekezo cyatanzwe n’abakuru b’ ibihugu byacu byombi.»

Muri iri huriro rizabera mu kigo ndangamuco cy'abakoresha igifaransa mu Rwanda giherereye ku Kimihurura, abanditsi mpuzamahanga bazatanga ibiganiro binyuranye kandi banasure by’umwihariko  urubyiruko mu bigo bitandukanye by'amashuri mu Mujyi wa Kigali mu rwego rwo gushishikariza abana umuco wo gusoma bakiri bato.

Agnes Ukundamariya umwe mu banditsi bazitabira iryo huriro asanga igikorwa nk’iki gifite akamaro kanini ku gihugu nk’u Rwanda.

Iri huriro mpuzamahanga ry'abanditsi b’ibitabo mu rurimi rw'igifaransa ryateguwe kandi mu rwego rwo kwizihiza umunsi mpuzamahanga wa francophonie wizihizwa tariki ya 20 z'ukwezi kwa gatatu buri mwaka.