Ubwinshi bw'abakristu! Barifuza kumenyeshwa miterere ya gahunda yo gusenga

Amadini n’amatorero yakomorewe akomeje gutondwa no guhuza gahunda zayo n’amabwiriza yo kwirinda COVID-19.

Bamwe mu bayoboke baraza bagasanga imyanya yuzuye cyangwa se gahunda zahindutse,ibi bakaba ari byo bashingiraho basaba abayobozi b’imiryango ishingiye ku myemerere gusesengura imiterere y’ikibazo bakagikemura.

Kiri kiriziya yitiriwe Umuryango  mutagatifu mu Mujyi wa Kigali abakiristu bari benshi ku mirongo bategereje kwinjira muri misa ya gatatu nk'uko bari babisezeranijwe. Cyakora haje kubaho impinduka misa ya gatutu itangira ku isaha ya saa ine abaje biteze gusenga ku isaha yari yagenwe basabwa gusubirayo.

Mbere yo kugenda, padiri yabanje kubahera umugisha hanze ndetse barahazwa.

Kugenzura ko insengero na kiriziya byubahiriza amabwiriza yo kurwanya icyorezo cya COVID 19 biri gukorwa n'inzego z'umutekano n'ubuyobozi bw'inzego z’ibanze.

Kuri zimwe mu nsengero na kiriziya n'ubwo bamwe mu bayoboke bazo basanze zuzuye bagataha,hari abagumye hafi aho bukurikirana  inyigisho mu madirishya.

Bamwe mu bayobozi b'iyi miryango ishingiye ku myemerere bavuga ko imibare y'abayoboke bayo iri kubabana myinshi ugereranije n'abo bemerewe kwakira mu rwego rwo kubahiriza amabwiriza yo kurwanya icyorezo cya COVID19.

Kuri iki cyumweru cya kabiri cyo gufungura  amateraniro na misa, ihuriro ry'amadini n'amatorero rigaragaza ko mu Mujyi wa Kigali insengero na Kiriziya byatanze inyigisho ari  19. Ni mu gihe izindi 7 zari zafunguwe ku cyumweru gishize zitemerewe gufungura kubera ibyo zisabwa gukosora.

Jean Paul TURATSINZE