Umujyi wa Kigali uravuga ko utazihanganira abakomeje kwangiza ubusitani

Ubuyobozi bw’Umujyi wa Kigali bwatangaje ko butazihanganira abakomeje kwangiza ubusitani babunyuramo n’abajugunyamo imyanda, kuko biri mu bibangamira gahunda ya Kigali ikeye kandi itoshye.

Ku mihanda hirya no hino mu Mujyi wa Kigali, hagaragara ubusitani burimo imitako y’indabo, ibyatsi byagenewe imitako ndetse n’inzira abagenzi bifashisha kandi zisukuye.

Hari na bamwe muri barwiyemezamirimo bashyize imbaraga  bashora  imari mu kurimbisha uyu mujyi, ku buryo hari ibyanya byashyizweho byo kwidagaduriramo no kuruhukiramo ndetse abaturage bakahafata amafunguro n’ibinyobwa  nyamara ibi bice byrahoze ari indiri y'amabandi.

Cyakora hakomeje kugaragara abangiza ubu busitani bwo ku mihanda babunyuramo cyangwa bakajugunyamo imyanda ndetse bamwe bagafatwa.

Polisi y’u Rwanda iri mu bukangurambaga bwo kwigisha abaturage kugira umuco w’isuku birinda kujugunya imyanda ku mihanda kuko biri mu byangiza ibidukikije n’ibi bikorwaremezo.

Umuyobozi w’umujyi wa Kigali wungirije ushinzwe imibereho y’abaturage, Urujeni Martine avuga ko batazihanganira abaturage bangiza isura y’ubwiza bw’umujyi wa Kigali kuko bibangamira intego bihaye zo kugira umujyi ukeye kandi utoshye.

Ibyegeranyo bigenda bikorwa bigaragaza ko umujyi wa Kigali uza mu myanya y’imbere mu kugira isuku ku mugabane wa Afurika.

Jean Paul Turatsinze