Urukiko rwo mu Bufaransa rwumvise impuguke mu rubanza rwa Bucyibaruta

Urukiko rwa rubanda rw’ i Paris mu Bufaransa, kuri uyu wa Kabiri rwakomeje kuburanisha urubanza rw’umunyarwanda Laurent Bucyibaruta ukurikiranweho kugira uruhare muri jenoside yakorewe abatutsi.

Urukiko rwatangiye iburanisha rutera utwatsi ubusabe bw’abunganira Bucyibaruta bari basabye ko urukiko rutaha agaciro ibivugwa n’uruhande rw’abaregera indishyi muri uru rubanza.

Urukiko kandi rwumvise impuguke mu manza nk’izi zikaba zifite akamaro kuko zifasha inteko iburanisha gusobanukirwa neza amateka y’u Rwanda n’aya jenoside yakorewe Abatutsi, by'umwihariko dore ko ababuranisha izi manza batoranywa mu baturage basanzwe baba batarize byanze bikunze ibyerekeye amategeko.