Uwari Umuyobozi wungirije w’Umujyi wa kigali yarahiriye kuba komiseri muri CNDH

Yanditswe May, 02 2019 21:19 PM | 10,930 Views

Perezida w’urukiko rw’ikirenga Professor Sam Rugege yakiriye indahiro ya Muhongerwa Patricia wagizwe komiseri muri komisiyo y’igihugu y’uburenganzira bwa muntu, amusaba kuzarangwa n’imyitwarire mizima no gutanga umusaruro wifuzwa.

Mu kwakira indahiro ya Muhongerwa Patricia, Perezida w’urukiko rw’ikirenga Professor Sam Rugege, yashimye ibimaze gukorwa na komisiyo y’igihugu y’uburenganzira bwa muntu nyuma ya jenoside yakorewe abatutsi ndetse asaba komiseri Muhongerwa kuzuza neza inshingano ze.

Komiseri Muhongerwa Patricia nawe yagaragaje ko yiteguye gufatanya n’abandi asanze muri iyi komisiyo.

Mu bubasha komisiyo y’igihugu y’uburenganzira bwa muntu ifite harimo kuregera inkiko igihe habayeho ihungabana ry’uburenganzira bwa muntu buteganywa n’itegeko nshinga n’amasezerano mpuzamahanga igihugu cy’u rwanda cyasinyeho ndetse kinemeza burundu.

Hari kandi kuba yakwinjira mu iburanisha ry’imanza zirebana n’uburenganzira bwa muntu ikagaragaza uko ibirebana n’uburenganzira bwa muntu biburanwa yifashishije amategeko.

Muhongerwa Patricia warahiriye kuba komiseri muri komisiyo y’igihugu y’uburenganzira bwa muntu; yari asanzwe ari umuyobozi w’Umujyi wa kigali wungirije ushinzwe imibereho myiza y’abaturage.

Inkuru ya Butare Léonard

Sangiza abandi kuri