Davis D agiye kwizihiza imyaka 10 amaze mu muziki

Umunyamuziki Icyishaka Davis wamamaye nka Davis D yatangaje ko ari mu myiteguro y’igitaramo azizihirizamo imyaka 10 amaze mu rugendo rwa muzika.

Iki gitaramo yise ‘10 Years Davis D Concert’ giteganyijwe mu mpera z’uyu mwaka ndetse imyiteguro yacyo yaratangiye cyane ko n’ubwo kizabera mu Mujyi wa Kigali ariko kizakurikirwa n’uruhererekane rw’ibitaramo azakorera i Burayi.

Davis D wari umutumirwa mu makuru ya Radio Rwanda ku wa Gatandatu yagize ati “Ntabwo ari bya bitaramo bakunze kubona biri hanze y’Igihugu, ahubwo noneho kiri hano mu gihugu, gifite (insanganyamatsiko) imyaka 10 y’urugendo rwanjye mu muziki. Imyaka 10 izuzura muri uyu mwaka uri kurangira.”

Uyu muhanzi yatangiye urugendo rwe rwa muzika mu mwaka 2014, aho yamenyekanye cyane binyuze mu ndirimbo zirimo ‘Biryogo’ yakoze mu 2015. 

Davis D yashyize hanze indirimbo nyinshi ziri kuri album zitandukanye zirimo iyo aheruka gusohora yise ‘Afro-Killer’.