Perezida Kagame yasoje uruzinduko yagiriraga muri Sénégal

Yavuye muri Sénégal aherekejwe na Minisitiri w’Intebe w’iki gihugu, Ousmane Sonko.

Perezida Kagame yageze i Dakar muri Sénégal ku wa Gatandatu aho yakiriwe na mugenzi we Bassirou Diomaye Diakhar Faye na bamwe mu bagize Guverinoma.

Abakuru b’ibihugu byombi bagiranye ibiganiro byihariye byibanze ku butwererane buhuriweho, kwagura umubano usanzweho ndetse n’inzego bifatanyamo zirimo ubukerarugendo, ubucuruzi n’imiyoborere.

Perezida Diomaye yanakiriye Perezida Kagame ku meza mu gukomeza kunoza umubano uhuriweho.

Banakurikiye umukino wa nyuma usoza iya Sahara Conference yo gushaka itike ya BAL 2024 izabera mu Mujyi wa Kigali. Uyu mukino wabaye ku mugoroba wo ku wa 12 Gicurasi 2024 warangiye AS Douanes yo muri Sénégal itsinze APR BBC yari ihagarariye u Rwanda amanota 79 kuri 54.

Kuri uyu wa Mbere ni bwo Perezida Kagame yasoje uruzinduko yagiriraga muri Sénégal. Yahise yerekeza muri Guinée Conakry, mu ruzinduko rugamije gushimangira umubano hagati y’igihugu cye n’u Rwanda.