Angola yashimye umuhate urimo gushyirwa mu biganiro byo kugarura amahoro muri RDC

Perezida wa Angola, João Lourenço yashimye inzego zitandukanye ku muhate n'imbaraga zirimo gushyira mu biganiro bigamije kugarura amahoro mu gihugu cya Repubulika Iharanira Demokarasi ya Congo.

Ibi yabigarutseho mu nama y’abahagarariye ibihugu byabo mu Muryango w’Akarere k’Ibiyaga bigari (ICGLR) yabereye i Luanda muri Angola.

Ni inama yanitabiriwe na Minisitiri w’Intebe, Dr Edouard Ngirente.

Perezida wa Angola João Lourenço niwe wayoboye iyi nama idasanzwe ya ICGLR ku mahoro n’umutekano muri Repubulika iharanira Demokarasi ya Kongo na Sudan.

Ku bijyanye n’ikibazo cy’imitwe yitwaje intwaro yiganje mu burasirazuba bwa Kongo Perezida wa Angola João Lourenço yavuze ko gahunda yo guhagarika imirwano yagezweho nk’uko byari byumvikanyweho n’ubwo hakiri ibibazo bimwe na bimwe bigiteza umutekano mucye bikigaragara mu gihe ibiganiro bikomeje.

Perezida wa Angola yashimangiye ko hakwiye kongerwa imbaraga muri gahunda zigamije guha umutekano abaturage bo mu Burasirazuba bwa Kongo umutwe wa M23 uvuga ko urwanirira.

João Lourenço yashimye umwanzuro wafashwe na SADC wo kohereza ingabo mu Burasirazuba bwa Kongo nk’igisubizo ku mahoro n’umutekano ku butaka bwa Kongo.