Doing Business Report: Banki y’isi igiye kohereza intumwa zayo mu Rwanda

Banki y’isi muri iki cyumweru irohereza intumwa zayo mu Rwanda kuvugana na Guverinoma ku bijyanye n’imihindagurikire y’ibipimo ngenderwaho mu gutegura isuzuma ku bihugu byorohereza ubucuruzi izwi nka Doing Business Report. Uku gusuzumira hamwe ibipimo bishya bishingirwaho kuraterwa n'uko guverinoma y’u Rwanda ivuga ko mu byateye gusubira inyuma ku rutonde rw’ibihugu byoroshya ubucuruzi muri raporo iherutse byatewe n'uko impuguke za banki y’isi zikora iryo suzuma zahinduye ibipimo ngenderwaho bikaba byaragize ingaruka atari ku Rwanda gusa ahubwo no ku bindi bihugu. U Rwanda rwasubiye inyuma imyanya 7 ruva ku mwanya wa 55 rugera ku mwanya wa 62 ku isi, n'ubwo muri Afurika rwagumye ku mwanya wa kabiri inyuma y’ibirwa bya Maurice no ku mwanya wa mbere mu karere ka Afurika y’iburasirazuba ndetse n’ibiyaga bigari.