Ambasaderi Rutabana yagaragaje uko u Rwanda rwaharaniye ubudaheranwa nyuma ya Jenoside

Ambasade y'u Rwanda muri Uganda yifatanyije n'abayobozi muri Minisiteri y'Ububanyi n'Amahanga muri icyo gihugu, abanyeshuri ndetse n'abarezi bo muri Kaminuza ya Makerere, kwibuka ku nshuro ya 30 Jenoside yakorewe Abatutsi.

Ambasaderi w'u Rwanda muri Uganda, Joseph Rutabana yagaragaje ko imyaka 30 ishize Jenoside yakorewe Abatutsi ihagaritswe, hari byinshi byakozwe imbere mu gihugu by'umwihariko kubaka urwego rw'ubudaheranwa ndetse no kwiyubaka bishingiye ku nzira y'ubumwe n'ubwiyunge Abanyarwanda biyemeje.

Iki gikorwa cyo Kwibuka ku nshuro ya 30 Jenoside yakorewe Abatutsi, cyabereye kuri Kaminuza nkuru ya Makerere, aho bamwe mu banyeshuri ndetse n'abarezi bakitabiriye bigishijwe amateka ndetse n'umuzi wa Jenoside yakorewe Abatutsi ndetse banasobanurirwa urugendo rw'ubudaheranwa no kwiyubaka kw'Abanyarwanda mu myaka 30 ishize.