U Rwanda na Gabon byinjiye mu bufatanye bwo kurwanya ruswa

U Rwanda na Gabon byinjiye mu bufatanye bugamije kureba uko ibihugu byombi byakorana mu gukumira no kurwanya ruswa.

Kuri uyu wa Kabiri, habaye ibiganiro byahuje Umuvunyi Mukuru, Nirere Madeleine n’Intumwa za Komisiyo ishinzwe kurwanya Ruswa n’Iyezandonke muri Gabon ziri mu ruzinduko mu Rwanda.

Perezida w’iyi Komisiyo, Nestor Mbou n’Umuvunyi Mukuru, Nirere Madeleine bahurije ku kuba ruswa n’iyezandonke ari ibyaha bigomba gukumirwa no kurwanywa n’ibihugu byose, bityo ko ubufatanye ari ngombwa.

Izi ntumwa zo muri Gabon zivuga ko mu byo zigiye ku Rwanda harimo gukoresha ikoranabuhanga muri serivisi zo gutanga akazi, gushaka ibyangombwa byifashishwa mu butabera no kumenyekanisha umutungo.

U Rwanda narwo hari ibyo rwigiye kuri Gabon, birimo kurinda umwirondoro w’abatangabuhamya n’uburyo amakuru kuri ruswa no ku byaha bimunga ubukungu atangwamo, abayatanze bakazahembwa nyuma yo gusuzuma neza ko ari yo koko.

Izi ntumwa zo muri Komisiyo yo gukumira ruswa n’iyezandonke muri Gabon, zageze mu Rwanda ejo ku wa mbere aho zanahise zisura Urwibutso rwa Jenoside yakorewe Abatutsi rwa Kigali ruri ku Gisozi, basobanurirwa amateka yayiranze ndetse n'urugendo rwo kwiyubaka Igihugu cyanyuzemo.

Intumwa zo muri Komisiyo yo gukumira ruswa n’iyezandonke muri Gabon zasuye Urwibutso rwa Jenoside rwa Kigali zisobanurirwa amateka yayo n'urugendo rwo kwiyubaka Igihugu cyanyuzemo.