Musanze: Kwiga amategeko y’umuhanda byafashije abanyonzi kugabanya impanuka

Tuyambaze Jean Baptisite amaze imyaka itanu ari muri Koperative y’abatwara abantu n’ibintu ku magare mu Karere ka Musanze CVM. Afite uruhushya rwa burundu rwo gutwara ibinyabiziga rwo mu rwego rwa B. Kimwe na bagenzi be bandi bakabakaba 500 bamaze kubona impushya z’agateganyo zo gutwara ibinyabiziga, bahamya ko gutwara igare uzi amategeko y’umuhanda ari ingirakamaro cyane kuko bifasha mu kugabanya impanuka zikunze gushinjwa abatwara amagare.

Uretse gutwara igare uzi amategeko y’umuhanda, aba batwara amagare banahamya ko kubona uruhushya rwo gutwara ibinyabiziga uri umunyozi nk'uko bakunze kubita ngo bigufungurira inzira yo gutera intambwe yerekeza no gutwara ibinyabiziga.

Ubuyobozi bwa Koperative yo gutwara abantu n’ibintu mu Karere ka Musanze CVM buvuga ko bufasha uru rubyiruko kwiga amategeko y’umuhanda mu rwego rwo kurufasha gukora ibyo bazi neza nk'uko bisobanurwa na Mutsindashyaka Evariste Umuyobozi w’iyi Koperative.

Koperative yo gutwara abantu n’ibintu ku magare mu Karere ka Musanze CVM ifite abanyamuryango 1051. Abarenga kimwe cya kabiri bamaze kubona impushya zo gutwara ibinyabiziga aho iz’agateganyo ari zo ziganje.

Uwimana Emmanuel